مملکت ملی خوفسیزلیک کینگشی مصلحتچیسی حمدالله محب، افغانستان بوییچه چین نینگ خاص نمایندهسی دینگ زیجون بیلن اوچرهشدی.
ملی خوفسیزلیک کینگشی دفتری تامانیدن نشر قیلینگن خبرنامهده یازیلیشیچه، اوشبو اوچرهشوو اوتگن کون کابلده ملی خوفسیزلیک کینگشی دفتریده بولگن، جناب زیجون افغانستان تینچلیک سوزلشوولری توغریسیده چین نینگ سونگی سعی و حرکتلری توغریسیده حمدالله محب گه معلومات بیرگن.
دینگ زیجون نینگ ایتیشیچه، مملکتی افغانستانلیکلرنینگ حاکمیتی و ییتکچیلیگی ده تینچلیک جریانیدن حمایت قیلهدی و احتمالی تینچلیک کیلیشوو عمل گه آشیریلیشی نی تأمینلش گه تیار دیر.
شونینگدیک، افغانستان بوییچه چین نینگ خاص نمایندهسی گه کوره، مملکتی افغانستانلیکلرنینگ حاکمیتی و ییتکچیلیگی ده تینچلیک سوزلشوولری گه زمینه یرهتیش و میزبانلیک قیلیش گه علاقهدار بولگن.
اوشبو اوچرهشووده اونینگ اورغولشیچه، افغانستان حکومتی نینگ حضوری بولمهگنده و جریان گه دخالت قیلمهگنده، تینچلیک خصوصیده بولگن هرقندهی کیلیشوو و ترتیبات عمل گه آشیریلمهیدی و چین دولتی تینچلیک سوزلشوولریده جمهور رئیس غنی نینگ سعی و حرکتلریدن حمایت قیلهدی.
اوتکزیلگن اوچرهشووده مملکت ملی خوفسیزلیک کینگشی مصلحتچیسی حمدالله محب نینگ ایتیشیچه، افغانستان اهالیسی، خوفسیزلیک و مدافعه کوچلری تینچلیک تأمینلنیشی خصوصیده کوپلب قربانلیک بیرگنلر و بو قربانلیکلرگه حرمت قایل بولینیشی کیرهک.
جناب محب نینگ کوپهیتیریشیچه، تینچلیککه ایریشیش خصوصیده افغانستان ارادهسی کوچلی و برنامهسی تولیق دیر و شونینگدیک، ترورچیلیککه قرشی کورهش توغریسیده حکومت تامانیدن بیریلگن سوز حاضرگی هم کوچلی بولگن.
