پرون د پنجشېر د غميزې په اړه د کابينې په فوق العاده غونډه کې سر له ننه، چې د ۲۰۱۵م زیږديز کال د فبرورۍ له ۲۸مې نېټې سره برابره ده، د ولسمشر اشرف غني له لورې په ټول هېواد کې د درې ورځو لپاره د ملي ماتم اعلان وشو.
د هېواد په ځينو سيمو کې د دوامداره ورښتونو او واورې ښویېدلو له کبله ګڼ شمېر خلک وژل شوي او کورونه يې له منځه تللي دي، چې په کې د افغانستان ټولو ولايتونو په پرتله پنجشیر ولایت ته زيات زیان رسیدلی دی.
وروستي راپورونه ښيي، چې په دې ولایت کې د واورو ښویېدو له امله شاوخوا ۲۵۰ کسان مړه شوي دي.
افغان ولسمشر د جمعې په ورځ په دې ولايت کې د مصيبت ځپلو خلکو څخه د لیدنې پر مهال وويل؛ " د وزيرانو شورا مې په همدې خاطر راوغوښته، چې ټولو وزارتونو ته د تيار سئ حکم ورکړم او د دې تر څنګ هوايي قوا هم باید مصیبت ځپلو ته د هوا له لارې مرستې ورسوي."
ولسمشر غني زیاته کړه، چې دا مصيبت د ټولو افغانانو دی او ټول افغانان دا درد حس کوي.
ولسمشر همدار راز وویل، چې ۲۰ میليونه افغانۍ به فوراً د شهيدانو په کورنيو او ټپيانو ووېشل شي.
له ارګ څخه په خپره شوې خبر پاڼه کې دا هم راغلي، چې په دې درې ورځو کې به د هېواد په ټولو سیاسي دفترونو او سياسي څانګو کې ملي بېرغ نیم زوړند وي.
د کابېنې په ناسته کې له دینې علماو او قومي مخورو هم غوښتل شوي، چې د دې پېښو د قربانیانو لپاره دې د فاتحې او قران عظیم الشان د ختم مراسم ونیسي.
له ارګ څخه په خپره شوې خبر پاڼه کې کاږل شوي، چې سبا ( د کب په ۱۰ مه ) د طبیعي پېښو د قربانیانو لپاره د ارګ او د پلارمېنې کابل ښار په نورو جوماتونو کې به د فاتحې مراسم ونیول شي.
د پنجشیر ولایت د واورې ښوېدنې د پېښې د قربانیانو شمېر د زیاتوالي په موخه اجرایوي رییس عبدالله عبدالله به درې ورځې په یاد ولایت کې وي.
جمهورییس د کابېنې په دې ناسته کې ټولو اړوندو بنسټونو ته امر وکړ، چې د واورې لاندې د بند پاتې شویو کسانو، قربانیانو لیږد، او د ټپیانو په درملنه کې د لومړنيو مرستو په موخه په ټولو ولایتونو کې هڅې کړندۍ کړي.
دا په داسې حال کې ده، چې خلک او ځينط کار پوهان حکومت په دې تورنوي، چې د طبيعي پېښو پر وړاندې د مبارزې لپاره منظم پروګرام نه لري او حکومت هغه مهال له پېښو خبريږي، چې د قربانيانو شمېر زیات شي.
ولسمشر د پنجشېر له سرپرست والي عبدالرحمان کبيري وغوښتل، چې د مرستو لپاره نور تدابیر هم په پام کې ونيسي.
غني وايي، چې ځپل شوي کورنۍ به دوامداره ستونزې لري او د دوی د دوامداره ستونزو د حل په موخه باید د پنجشیر سرپرست والي لازم پروګرامونه جوړ کړي.
