نړیوالو رسنیو د امریکايي چارواکیو له خولې راپورونه خپاره کړي، چې د امریکا متحده ایالتونه را روانه اوونۍ پرېکړه کوي، چې افغانستان ته ۴ زره نور تازه دمي پوځيان را وليږي.
سرچینې وایي، چې دا اضافي سرتېري به د افغان ځواکونو روزنې او هغوی ته د مشورې دنده ولري او لږ شمېر به یې د طالبانو او داعش ډلو پر ضد عملیاتو کې ونډه هم واخلي.
د سیاسي او پوځي چارو شنونکي باوري دي، چې په افغانستان کې د امریکایي ځواکونو شمېر زیاتېدل نه یوازې دا چې د امنیت په ټینګښت کې مرسته نهکوي، بلکې په سیمهییزه او نړیواله کچه سیالۍ او تربګني نورې هم زیاتوي.
د سیاسي او پوځي چارو شنونکي جاوید کوهستاني سلاموطندار ته وویل، چې د امریکایي ځواکونو شمېر له زیاتېدلو سره په افغانستان کې ترهګر نه ځپل کېږي، بلکې د دې امکان شته، چې د سیمې هېوادونه او ترهګریزې ډلې خپل فعالیتونه څو چنده ډېر کړي.
کوهستاني زیاته کړه، که په افغانستان کې د بهرنیو ځواکونو د حضور په اړه رڼه تګلاره او پالیسي نه وي؛ د دوی راتګ اندېښنې پیدا کوي.
دی ټینګار کوي، چې افغان حکومت باید اوسنی روان هر اړخیز بهیر ښه او په سمه توګه مدیریت کړي.
دغه راز، د پوځي چارو بل شنونکی جنرال عتیقالله امرخېل باوري دی، چې د امریکا متحده ایالتونه د سرتېرو په زیاتولو سره په افغانستان کې ترهګري لهمنځه نهشي وړلی، بلکې یوازې خپل دریځ پیاوړی کوي.
امرخېل همدارنګه تېرو تجربو ته په کتلو سره وویل، چې د امریکايي ځواکونو له زیاتېدلو سره په هېواد کې جګړه نوره هم پیاوړې کېدلی شي او د سیمې هېوادونه به نیابتي جګړې ته زور ورکړي.
دی وړاندیز کوي، د دې پر ځای چې امریکا د خپلو سرتېرو شمېر زیات کړي، افغان امنیتي ځواکونه دې ښه وروزي او ښه تجهیزات دې ورکړي.
هاخوا د ولسي جرګې یو شمېر غړیو هم د دې جرګې د شنبې ورځې په عمومي غونډه کې وویل، چې افغانستان ته د تازه دمو امریکايي سرتېرو لېږد یوازې یوه سیاسي دوکه ده او په هېواد کې روانې جګړې ته د پای ټکی نهشي اېښودلی.
غونډه کې د ولسي جرګې غړي محمد سرور عثماني فراهي وویل، که امریکا د افغانستان په اړه رښتینې وي؛ په پاکستان کې دې د ترهګرو ځالې وځپي، امنیتي تړون ته دې درناوی او افغان امنیتي او دفاعي ځواکونه دې په پرمختللو تجهیزاتو سمبال کړي.
امریکایي چارواکي وایي، چې افغانستان ته د نویو ځواکونو په لېږلو سره به تېرې ناکامې تجربې تکرار نهکړي، بلکې له نویو کړنلارو سره د افغان دولت ملاتړ او اجازه به ورنهکړي، چې افغانستان په بېدولته خاوره بدل شي.
د معلوماتو لهمخې اوسمهال په افغانستان کې ۸۴۰۰ امریکايي سرتېري مېشت دي، چې د افغان ځواکونو د روزنې ترڅنګ هغوی ته سلا ـ مشورې هم ورکوي.
