په کابل کې د افغانستان د جهادي او ملي ګوندونو عالي شورا د خپل موجودیت د اعلان پر مهال له حکومت څخه غوښتنه وکړه، چې په راتلونکو ټاکنو کې دې سیاسي ګوندونو ته ونډه ورکړي.
دغې شورا چې د یوولسو جهادي او سیاسي ګوندونو مشران په کې ګډون لري؛ نن (دوشبنه) په کابل کې خپل موجودیت اعلان کړ.
د غونډې پر مهال د دې شورا ویاند سید حامد ګیلاني وویل، د دوی شورا کلک هوډ لري، چې خپل پيغام نورو سیاسي او جهادي ګوندونو ته ورسوي.
د ده پر وینا، شورا یې نه یواځې په کابل پورې تړلې ده، بلکې نوره به هم پراخه شي: " دا شورا د یوولسو مختلفو جهادي، روحاني او سیاسي ګوندونو څخه جوړه شوې، چې لمن به یې د هېواد نورو ولایتونو ته هم وغځېږي."
سید حامد ګیلاني وايي، چې د سولې له پاره د حکومت هر ډول ګام ستايي، حکومت باید پر قانونمندۍ ټينګار وکړي او هڅه کوي، چې د فساد پر وړاندې د مبارزې تر څنګ ځوانانو ته کار د کار زمینه برابره کړي.
ښاغلی ګیلاني زیاتوي، موخه یې دا ده، چې حکومت د ټاکنو مهالوېش اعلان او په ټاکنو کې سیاسي ګوندونوته ونډه ورکړي.
ګیلاني دا هم وویل، چې د افغانستان د جهادي او ملي ګوندونو عالي شورا به حکومت ته د سولې په برخه کې یوه جامع طرحه هم وړاندې کړي.
دغه راز، د دې شورا مسوولان وايي، چې د ټاکینز نظام په سمون کې باید د حزبونو رول پياوړی شي.
له دې وړاندې هم کابل کې د یو شمېر پخوانیو جهادي مشرانو او د حامد کرزي د وخت د کابینو د ځېنو غړو له خوا د حراست او ثبات په نوم یوه شورا اعلان شوه، چې له ځېنې غوښتونو سره یې حکومت مخالفت وښود.
