.jpg)
نن په کابل کې د حزب اسلامي په مشرۍ د دې ګوند امیر ګلبدین حکمتیار، حق او عدالت ګوند، ملي پیوند ګوند، د عالمانو شورا او یو شمېر مدني بنسټونو د بېلابېلو خبري غونډو پرمهال له ملي یووالي حکومت څخه خپل ملاتړ اعلان کړ.
د حزب اسلامي امیر ګلبدین حکمتیار په کابل کې وروستی ترهګریز برید وغندلو او ویې ویل، په سیاسي نظام کې هر ډول بدلون باید له سوله ییزې او مناسبې لارې وي، د ټولو هېوادوالو او سیاسي لورو په خوښه وي؛ نه د یوې ځانګړي لوري له خوا.
ګلبدین حکمتیار وویل، د نظام له نسکورولو سره موافق نه دی او هېچا ته به د دې اجازه ورنه کړي.
ښاغلي حکمتیار وویل، د حکومت پروړاندې اعتراض کول د خلکو مدني حق دی؛ خو زیاتوي، هغه کسان چې د نظام نسکورول غواړي او مناسب بدیل ورته نه لري، وسله والو مخالفینو ته لا زیات فرصت برابروي.
د حزب اسلامي امیر وویل، هغه کسان چې له وسلو سره راځي له امنیتي ځواکونو سره نښته کوي، د نورو پر خلاف شعار ورکوي، دغه ډول څرګندونې شخړې رامنځته کړي.
حکمتیار وویل، هېڅوک باید د ارګ له دېوالو د اوښتلو او د نظام ړنګولو فکر ونه کړي.
د حزب اسلامي مشر وویل، د وضعیت سم لاسي مهارولو لهپاره باید مثبته لاره غوره شي او د جنجال جوړونکو اقداماتو څخه مخنیوي وشي.
حکمتیار وايي، له ځینو شواهدو معلومیږي، د کابل، هرات او نورو پېښو تر شا د بهرنیو کړیو لاس دی، د جګړې په دوام کې یې ګټي دي او دوام یې غواړي.
ګلبدین حکمتیار وویل، دوی د نظام سره د هر ډول صادقانه مرستې په پار چمتو دي.
حکمتیار وايي، له معترضینو غواړو، چې په سړکونو د خېمو ودرول دې نه رواجوي.
د حق او عدالت ګوند له حکومته د ملاتړ په څرګندولو د بدلون پاڅون له اعتراض کوونکو وغوښتل، چې خپلې غوښتنې دې د تفاهم له لارې د حکومت سره شریکې کړي.
د دې حزب رییس معین مرستیال خلک یووالي ته راوبلل او ویې ویل، اجازه مه ورکوئ، چې د افغانستان دوښمنان خپلو موخو ته ورسېږي.
د دې ګوند له خوا په خپرې شوې اعلامیې کې راغلي، چې د ولسمشر، اجرایوي رییس او د ملي امنیت سلاکار د استعفا غوښتنه قانوني نه ده او دا چاره امکان نه لري.
دغه راز د ملي پيوند ګوند رییس سید منصور نادري هم له حکومت څخه ملاتړ کړی دی.
سید منصور نادري وايي، روان حالت باید درک شي او د یو شمېر هېوادوالو او سیاسي ګوندونو له خوا د ملي امنیت شورا د سلاکار د استعفا غوښتنه ناسمه ده.
د عالمانو شورا هم له خلکو وغوښتل، چې له ثبوت پرته دې د امنیتي ځواکونو په مشرانو تور نه لګوي او حکومت ته یې پروینا وویل، د خلکو ستونزو ته دې لاس رسي وکړي.
په ورته وخت کې د پاڅون بدلون اعتراض کوونکي په خپلو غوښتنو ټینګار کوي او وايي، اعتراض او غوښتنې یې سیاسي نه دي.
دوی وايي، موخه یې د امنیت ټینګښت دی.
