د افغانستان د پانګونې ملاتړ ادارې مسولین وايي، د هېواد کارګرانو ته که اسانتیاوې برابرې شي؛ د هېواد ۵۰ سلنه مصرفي بوټ تولید کوی شي.
د ایسا ادارې رییس محمد قربان حقجو د اګسټ په ۲۲مه د شنبې په ورځ په یوې خبري ناسته کې وویل، چې د بوټ جوړولو کلنی ظرفیت ۳ نیم ملیونه جوړې دی، که چېرې له سل سلنه ظرفیتونو کار واخیستل شي دغه کچه به ۷ میلیونه جوړې بوټونو ته لوړه شي، چې له ۴۰ تر ۵۰ سلنو پورې کورنۍ اړتیاوې پوره کولای شي.
حقجو وايي، د افغانستان په بازارونو باندې ګاونډي هېوادونه ولکه لري، د سوداګریزو کالیو پلورل د دمپنګ تر سرلیک لاندې، د تولید لپاره د اړین ځای نه لرل افغان صنعت کاران یې د بهرنیو تولیداتو د سیالۍ په ډګر کې پاتې راوستي دي.
نوموړی وايي، چې له کورنیو تولیداتو نه د خلکو ګټنه نه اخیستل د دې لامل شوې ده، چې د پلور په بازارونو کې کورني تولیدات خپل ارزښت له لاسه ورکړي.
قربان د کورنیو تولیداتو د پرمختګ یواځینۍ لاره د ګاونډویو هېوادونو پر بې کیفیته تولیداتو د ګمرکي تعرفو لوړول بولي.
په ورته وخت کې د هېواد بوټونو صنعت کارانو د اتحاديې رییس محمد اصف جامي وايي، چې که د دوی ستونزو ته پام ونه شي د بوټونو صنعت به له منځه لاړ شي.
د جامي پر وینا، د صنعت کارانو په مخکې اساسي ننګونه له ګاونډیو هېوادونو د ورته سوداګریزو کالیو واردول دي.
دی وايي، چې د پاکستان، ایران او چین هېوادونو نه د زیاتو بوټونو واردول د کورني تولیداتو د پلور بازار کم رنګه کړی دی.
د دغې اتحادیې د رییس پر وینا، له دې چارې سره د سیالۍ له پاره حکومت ته په کار ده، چې له صنعت کارانو نه ملاتړ وکړي.
په بهرنیو وارداتو د ګمرکي تعرفو کموالی، د سوداګریزو کالیو قاچاق، په ګمرکونو کې بې غوري د دې لامل شوې، چې کورني شرکتونه له هېواده خپل پانګه وباسي.
اوسمهال په هېواد کې له ۴۵۰ زیاتې کارخونې موجودې دي او له بهره د بې کیفیته سوداګریزو کالیو را وارېدول زموږ د کارخونو د رکود لامل شوي دي
