جمهور رییس بیرینچی اورین باسری جنرال عبدالرشید دوستم طالبلرگه قرشی «قیلیچ» ناملی عملیاتنی جوزجان ولایتی نینگ خمآب تومنیده باشقرهدی، اونینگ ایتیشیچه، مذکور تومندن طالبلر ترکمنستان چیگرهلریگه قدر قوییب یوبارگن.
جناب دوستم ترکمنستان بیلن خمآب چیگره سیدهگی عسکرلرگه طالبلرنی چیریکی اوروشگه توتیلیش حکمینی بیرگن و اوزی ایسه چیگرهگه جنگریلرنی «قولگه آلیش» اوچون بارهمن دیگن.
خمآب تومنی ترکمنستان بیلن چیگره داش دیر.
شو حاضر جناب دوستم اوزی اوروشده حضور تاپگن، سلاموطندار بیلن اوتکزگن صحبتیده ایتیشیچه، بو عملیاتده 25 طالب هلاک بولگن، 15 کیشی مذکور گروهدن یرهلنیب و باشقه 13 کیشی هم قولگه آلینگن. اونینگ ایتیشیچه، طالبلر تامانیدن اورنهتیلگن ماین پارتلهنیشی بیلن محلی پولیس کوچلریدن 5 کیشی هلاک بولگن و باشقه 7 کیشی هم تن جراحتی آلگن.
جمهور رییس بیرینچی اورین باسری نینگ بیلدیریشیچه، بو اوروشده امنیتی کوچلردن 1500 کیشی قتنشگن و اوشبو تومن جنگریلر بارلیگیدن پاک بولیشی بیلن، فاریاب ولایتی غورماچگه تامان بارهدی و طالبلردن قصد آلیش اوچون قندوز ولایتیگه بارماقچی.
جناب دوستم بو تومندن طالبلرنی پاکلشی بیلن، یوللرده امنیتی پوسته قوییشینی تیلگه آلهدی.
خمآب تومنی نینگ یشاوچیلری طالبلرگه قرشی حربی عملیات اوتکزیلیشدن حمایت قیلیشلری یانیده، حکومتدن مذکور تومن پاک بولیشی بیلن امنیتی کوچلردن کوپچیلیک قالیشینی ایستیدیلر.
خمآب یشاوچیلریدن بیری نورالله نینگ ایتیشیچه، مذکور عملیاتده تینچ اهالی آسیب کورمهگن و شوحاضر اهالی عادی شکلیده یشب کیلماقدهلر. اونگه کوره، اوشبو تومنده طالبلر اهالی نینگ ایش سیز قیلیب بدرغه بولیشلریگه سبب بولگن ایدی.
اوتگن هفته طالبلر بیر هجوم آرقهلی مذکور تومن مرکزینی تصرف قیلگن ایدیلر.
