افغانستانده خلق ارا کوچلرینینگ حربی قوماندانی جنرال جان میک نیکلسون، قندوز ولایتیگه قیلگن سفریده، ولایتدهگی چیگره بیلمس شفاکارلر ادارهسیگه باریب، بو اداره هجوم آستیگه آلینگنی اوچون تشکیلاتی مامورلریدن کیچیریم سورهگن.
قندوز قوراللی طالبلر اشغالیگه اوتگنده، امریکهنینگ حربی طیارهلری ولایتدهگی چیگره بیلمس شفاکارلر ادارهسینی هجوم آستیگه آلگن ایدی. نتیجهده 22 انسان حیاتدن کوز یومگن ایدی.
مملکتدهگی خلق ارا حربی کوچلری قوماندانی بو ولایتگه افغانستان مدافعه وزیرلیگی سرپرستی معصوم استانکزی و ایچکی ایشلر وزیرلیگی سرپرتی تاج محمد جاهد بیلن بیرگه سفر قیلگن. او، اوشبو سفر جریانیده ولایت رسمیلری بیلن اوچرهشگندن علاوه، حادثهده قربان بولگن کیشیلر خانهدانیگه باریب، قیغوداشلیک بیلدیرگن.
قندوزده چیگره بیلمس شفاکارلر تشکیلاتیگه هجوم اتهیین عملگه آشیریلمهگن لیگینی تصدیقلهگن ولایت والیسی اسدالله عمرخیل قربانلر عایلهسیگه قیغوداشلیک بیلدیرگن.
شونینگدیک مملکتده کیسین ماموریت عمومی قوماندانی امریکهلیک جنرال افغانستان ملی مدافعه و ایچکی ایشلر وزیرلری بیلن خبری بیر انجمن اوتکزیب، هنوزگچه ولایتده قوراللی طالبلر نابود ایتیلیشی اوچون ییریک حربی عملیات اوتکزیلمه گنلیگی توغریسیده اهالی سوراقلریگه جواب بیرگن.
مدافعه وزیرلیگینینگ سرپرستی تیزلیکده قندوز دولت قوراللی مخالفلریدن تازهلنهدی دیگن.
ناتونینگ افغانستاندهگی کیسین ماموریت حربی قوماندانی، بوندن نیچه وقت آلدین امریکه ملی مدافعه وزیرلیگی تامایندن خانهدان اعضالرینی قولدن بیرگن عایلهلرگه نقدی مبلغ بیریلگن بیر پیتده بو ولایتگه سفر قیلماقده. اما، قربانلر عایلهسی حادثهده هلاک بولگنلر قانیگه حرمت سیزلیک قیلیش دییه تیلگه آلگن ایدیلر.
مملکت شمال شرقیده جایلشگن قندوز ولایتی اوتگن ییل میزان آیی اوچ کون دولت قوراللی مخالفلری نینگ اشغالیگه اوتگن ایدی. ایتلیشیچه، هنوز هم ولایتنینگ بیر قنچه تومنلریده جنگری طالبلرنینگ فعالیتی کوزهتیلهدی.
