بدخشان ولایتی نینگ کرانومنجان تومنی طالبان قولیگه سقوط قیلگنیدن سونگ، محلی قومندانلردن بولمیش قومندان ملک طالبان گروهیگه قوشیلگن.
اوشبو محلی قومندان اسلامی جمعیت حزبیگه تیگیشلی بولگن نفوذلی قومندانلردن بیری دیر نیچه مدت بدخشان ولایتی نینگ بهارک و کرانومنجان تومنلریده پولیس قومندانی صفتیده فعالیت قیلگن.
بدخشان ولایتی کینگش باشلیغی بشیر صمیم نینگ سلاموطندارگه ایتیشیچه، حاضرده یمگان و وردوچ تومنی چکهسیده کرانومنجان تومنی هم کامل صورتده طالبان نظارتیگه اوتگن و اولرنینگ بو تومنلر آرقهلی پاکستان بیلن وصل بولیشی ممکن.
بدخشان ولایتی کینگش باشلیغی نینگ ایتیشیچه، کرانومنجان تومنی نینگ سقوط قیلیشی شمالی ولایتلر اینقسه بدخشان اوچون کته تهدید دیر.
بدخشان مدنی جماعه باشلیغی سیفالدین سایس نینگ سلاموطندارگه ایتیشیچه، کرانومنجان تومنی نینگ طالبان قولیگه سقوط قیلگنی و محلی قومندانلردن بولمیش ملک نینگ طالبان گروهیگه قوشیلگنی سبب، بو تومنی طالبان نظارتیدن چیقاریش امکانی یوق دیر.
جناب سایس نینگ کوپهیتیریشیچه، کرانومنجان تومنی نینگ بوتون حربی تجهیزاتلرینی طالبانگه تسلیم بیریلیشی بدخشان نینگ سقوط قیلیش خطری بیلن روپهره قیلگن.
بیراق، بدخشان محلی مقاملری کرانومنجان تومنی نینگ طالبان وجودیدن تازهلش اوچون حربی عملیات یولگه قویلیشی خصوصیده صحبت قیلهدیلر. اولرنینگ ایتیشیچه، کمکی کوچلر محلگه یوباریلهدی.
بدخشان حاکمی نینگ سوزلاوچیسی نیکمحمد نظری نینگ ایتیشیچه، یوللر تخریب بولگنی سبب، کمکی کوچلر حاضرگهقدر محلگه ییتیشمهگن.
کرانومنجان تومنی بدخشان ولایتی نینگ استراتژیکی تومنلریدن دیر و اوشبو تومن نورستان ولایتی و پاکستان نینگ چترال منطقهسی بیلن چیگرهداش دیر.
بدخشان ولایتی کینگش اعضالری و مدنی فعاللری نینگ ایتیشیچه، مذکور محلی قومندان نینگ طالبان گروهی بیلن معامله قیلگنی سبب، بو تومن طالبان قولیگه سقوط قیلگن و تدبیر آلینمهگن صورتده، بدخشان مرکزی نینگ سقوط قیلیش احتمالی بار دیر.
