د تخار ولایت پولیس وايي، د جندالله ترهګره ډله غواړي، چې په دغه ولایت کې نظامي او تروریستي اډه جوړه کړي.
د ياد ولایت امنيې قومندان نور محمد حکيمي سلام وطندار ته وویل، وروسته له هغه چې افغان امنيتي ځواکونو په کندوز ولایت کې د جندالله ترهګرې ډلې پر روزنیز مرکز بريدونه وکړل، نو اوس دغه ډله غواړي په تخار ولایت کې خپل پخوانی فعالیت له سره پېل او نظامي اډې تاسیس کړي.
د تخار امنيې قومندان وايي، چې پخوا د جندالله ډله پر چهاردره، امام صاحب او دشت ارچي ولسواليو کې فعاليت کاوه، خو کله چې د دوی اډې د افغان امنيتي ځواکونو تر بريدونو لاندې راغلل، نو دې ډلې پورې تړلې ترهګر د بغلان ولایت د بورکې ولسوالۍ له لارې د تخار اشکمش ته وتښتېدل.
د تخار ولایت امنيه قومندان وايي، چې د دوی د استخباراتي معلوماتو پر بنسټ د جندالله ډله د عامو وګړو په منځ کې د تبلیغاتو له پاره خپل کسان ځای پرځای کړي دي.
ملاخدای نظر، چې په دې وروستيو کې د جندالله له ډلې سره يوځای شوی و او د افغان امنيتي ځواکونو له لوري نيول شوی په خپلو اعترافاتو کې ویلي، چې جندالله د تخار ولایت اشکمش ولسوالۍ په وړو کلو کې خپل یوه وړه تبلغي ډله ځای پرځای کړې ده، څو عام خلک د دغې شبکې سره د يوځای کېدو له پاره وهڅوي.
ملاخدای نظر د کندوز ولایت د قلعه زال اوسېدونکی دی، چې اشکمش ولسوالۍ ته له رسېدو وړاندې سره د نورو پنځوو تنو سره د افغان امنيتي ځواکونو له لوري ونیول شو.
جندالله هغه ترهګریزه ډله ده، چې په ۸۰ مه هجري شمسي کال کې خپل ترهګریز فعاليتونه په افغانستان کې پېل کړل.
د دغې ډلې رهبري " طایر یولداش" په لاس کې ده، چې د القاعدې او طالبانو سره نږدې اړيکې لري.
پاکستاني چارواکي په ۲۰۰۹ م ميلادي کال کې اعلان وکړ، چې طاهر یولداش د دغه هېواد په شمال غرب سيمه کې د امريکا بې پېلوټه الوتکې د بمبارد په نتیجه کې وژل شوی دی.
خو دغه خبر بیا په ۲۰۱۰ م ز کال د يوې خپره شوې ويډيو کې دغه خبر رد کړ.
د جندالله ډله د سړک غاړې بمونو د جوړولو او جهادي قومندانانو په وژلو کې د ترهګرو ډلو په منځ کې خاص شهرت لري.
د افغان امنيتي ځواکونو په وينا دغه ډله د پامیر ۳۰۳ زون قومندان جنرال داود داود، د کندوز ولایت پخواني امنيې قومندان عبدالرحمان سېدخيلې په ترور کې هم لاس لري.
یاده دې وي، چې شاوخوا درې اوونۍ وړاندې د جندالله څانګې رهبر قاري غلام حضرت، چې په ابو حذیفه مشهور و د عمار په نوم خپل مرستیال سره یوځای سره د ۳ نورو کليدي غړو د ملي امنيت په هوايي بريد کې ووژل شو.
