د پاکستان د بهرنیو چارو وزیر د افغانستان په کورنیو چارو کې د اسلاماباد پر نه لاسوهنې ټینګار کوي.
مخدوم شاهمحمود قریشي نن سهار د یوه لوړپوړي پلاوي په مشرۍ افغانستان ته راغی او له ولسمشر محمداشرف غني او د بهرنیو چارو له سرپرست وزیر یې وکتل.
د بهرنیو چارو وزارت ویاند صبغت احمدي وايي، شاهمحمد قریشي په دغې غونډې کې د افغانستان په کورنیو چارو کې د پاکستان پر نه لاسوهنې ټینګار کړی او ویلي یې دي چې د افغان سولې بریا د سیمې هېوادونو مسوولیت دی.
د احمدي په وینا، د بهرنیو چارو وزارت هم په دې غونډه کې ویلي چې د کابل او اسلاماباد ترمنځ اړیکې په ښه کېدو دي او د افغان حکومت او طالبانو ترمنځ پر مخامخ خبرو اترو یې ټینګار کړی دی.
نوموړی وايي، پاکستان ژمنه کړې چې د افغان سولې لهپاره تر کورنۍ اجماع وروسته به د سیمهییزې اجماع جوړولو برخه کې له افغانستان سره همکاري وکړي.
دغه راز له ولسمشرغني سره د شاهمحمود د لیدنې پرمهال د دواړو هېوادونو پر دوه اړخیزو اړیکو، د افغانانو په رهبرۍ د سولې خبرو اترو او په دې برخه کې راتلونکیو اقداماتو په اړه بحث او خبرې اترې شوې دي.
