ملی بیرلیک حکومت اجراییه باشلیغی عبدالله عبدالله نینگ مصلحتچی‌لریدن بیری صاحب‌نظر سنگین، «اخلاقی فساد و بیر عیال‌نی قاچیریش» گه عیب‌لنیب کمیده آلتی آی آلدین اجراییه ریاستی‌دن چیکلنتیریلگن، بیراق بیر هفته آلدین، جمهور رئیس غنی نینگ اقلیت‌لر آسایشته‌لیگی و اجتماعی بیردملیک ایشلری بوییچه ییریک مصلحتچیسی صفتیده تعیین ایتیلگن.
اجراییه ریاستی‌دن ایشانچ‌لی بیر منبع نینگ ایتیشیچه، قویاش 1397- ییل‌ده صاحب‌نظر سنگین بیر عیال‌نی اوچ باله‌سی بیلن قاچیرگنیدن سونگ، عبدالله عبدالله نینگ مصلحتچیلیگی‌دن چیکلنتیریلیب و ایچکی ایشلر وزیرلیگی گه تانیشتیریلگن، بیراق نیچه آیدن سونگ، کوتیلمه‌گن حالده، جمهور رئیس غنی نینگ اقلیت‌لر آسایشته‌لیگی و اجتماعی بیردملیک ایشلری بوییچه ییریک مصلحتچیسی صفتیده ایش گه آلینگن.
شونینگدیک، سلام‌وطندارنی اختیاریده بولگن حجت گه کوره، جمهور رئیس غنی نینگ ینگی مصلحتچیسی صاحب‌نظر سنگین «اخلاقی فساد و بیر عیال‌نی قاچیریش» گه عیب‌لنگن.
حجت گه کوره، جمهور رئیس نینگ مصلحتچیسی بیلن غیر مشروع علاقه‌سی بارلیک‌که عیب‌لنگن «شکریه آتی عیال نینگ قیین‌آته‌سی حفیظ‌الله» قویاش «8/9/1397» تاریخی‌ده 101 آسمایی زون قومندانلیگی گه کیلینی یوقالگنی توغریسیده گزارش بیرگن.
شونینگدیک، جنایی جرملرگه قرشی کوره‌ش ایشلری بوییچه تدقیقات ریاستی، مذکور عیال نینگ بیلگیسی نی کابل شهری نینگ بوتون حوزه‌لریگه یوبارگن؛ اوشبو مکتوبنی بیر بولیمیده بونده‌ی دییلگن: «حرمتلی حفیظ‌الله تامانیدن بیریگن عریضه اساسیده، کیلینی اوچ باله‌سی بیلن بیرگه افشار منطقه‌سیدن قاچیب و درک‌سیز یوقالگن و شو یوزه‌دن اونینگ بیلگیسی و صورتی بو مکتوبده کیریتیلگن. شو اساسده، سیزلرگه خبر بیریله‌دی کیم مذکور کیشی تاپیلیشی اوچون کیله‌جک مسؤولیت‌نی سیزیب و مسلکی اساسات اساسیده، ایش گه کیریشلرینگ کیره‌ک.
ملی بیرلیک حکومت اجراییه باشلیغی هم قویاش «1/10/1397» تاریخی ده بو قضیه تیکشیریلیشی اوچو ایچکی ایشلر وزیرلیگی گه بیر مکتوب یوبارگن. اجراییه ریاستی دن ایشانچ‌لی بیر منبع نی سلام‌وطندارگه ایتیشیچه، صاحب‌نظر سنگین اجراییه ریاستیده مأمور بولگن چاغیده، اوندن نیچه مرته «اخلاقی فساد و بیر عیال‌نی قاچیریش» خصوصیده بولگن عیب‌لاولر توغریسیده معلومات بیریشی سوره‌لگن، بیراق جناب سنگین هر بیر مرته بو واقعه توغریسیده معلومات بیریش دن قاچگن.
منبع دن نقل قیلینیشیچه، نتیجه‌ده اجراییه ریاستی جناب سنگین نی مصلحتچیلیک مقامی دن چیکلنتیریب و ایچکی ایشلر وزیرلیگی گه تانیشتیریش خصوصیده قرار قیلگن.
ایچکی ایشلر وزیرلیگی بیر مکتوب آرقه‌لی خوفسیزلیک ایشلری بوییچه اورین باسرلیگی گه بونده‌ی یازگن: «بغلان ولایتی نینگ دوشی تومنی یشاوچیسی امان‌الله نینگ اوغلی حفیظ‌الله اجراییه ریاستی عنوانی گه تقدیم قیلگن عریضه‌سیده ادعا قیلیشیچه: صاحب‌نظر سنگین آتلی کیشی شهید بولگن اوغلیم داکتر صفی‌الله نینگ تورموش اورتاغی محمدعطانینگ قیزی شکریه بیلن غیرمشروع علاقه قوریب و اونی اوچ باله‌سی بیلن بیرگه کابل شهری نینگ افشار منطقه‌سیده‌گی کرالیک اویدن نامعلوم ییرگه قاچیرگن.»
ایچکی ایشلر وزیرلیگی نینگ دفترینی عمومی باشلیغی رحیم‌الله برهانی، مکتوبنی امضاءلب خوفسیزلیک ایشلری اورین باسرلیگی‌دن بو دوسیه گه دقت قیلیشی‌نی سوره‌گن. بوندن سونگ، خوفسیزلیک ییریک اورین باسرلیگی شو کونده دوسیه تیکشیریلیشی توغریسیده حکم صادر قیلیب و کابل پولیس قومندانلیگی‌دن بو توغریده قانونی شکلده عمل قیلیشی‌نی طلب قیلگن.
اوشبو حجت گه علاوه، سلام‌وطندارنی اختیاریده بولگن بیر ویدیوگه کوره، «قاچیریلگن عیال‌نی قیین‌آته‌سی» بو ویدیوده صاحب‌نظر سنگین نی اوغلی نینگ قتلی گه عیب‌لب و ایتیشیچه، سونگی پیت‌لرده قولگه کیریتگن معلوماتی اساسیده، اوغلی نینگ قتلی ده سنگین نینگ قولی بار ایکن.
قولگه کیریتیلگن معلومات اساسیده، شکریه حاضر کابل شهریده خوفسیز اویلردن بیریده حیات کیچیره‌دی.
عین حالده، جمهور رئیس غنی نینگ اقلیت‌لر آسایشته‌لیگی و اجتماعی بیردملیک ایشلری بوییچه مصلحتچیسی صاحب‌نظر سنگین، اونگه قرشی بولگن بوتون عیب‌لاولرنی رد قیلیب ایتیشیچه، بو دوسیه‌نی سیاسی رقیب‌لری و فاسد کیشی‌لر اونگه قرشی توزه‌تگن.
شونینگدیک، بو گزارش‌ده جمهورلیک ریاستی سرایی نینگ فکرینی آلیش اوچون علاقه قوردیک، بیراق جمهورلیک ریاستی سوزلاوچیسی اورین باسری شاه‌حسین مرتضوی نینگ ایتیشیچه، بو موضوع اونگه تیگیشلی بولمه‌یدی و باشقه مسؤوللر هم بو توغریده صحبت بیریش دن باش تارتگن‌لر.
سونگی کونلرده جمهورلیک ریاستی و ملی خوفسیزلیک کینگشی سابق مصلحتچی‌لریدن بیرقطاری آرقه‌لی جمهورلیک ریاستی سرایی‌ده‌گی اخلاقی فساد و فاسد تشکیلاتدن پرده کوتریلگنی جنجل توغدیردی. اوشبو گزارش بولینگن ادعالرنی اثباتلش اوچون مدرک بوله آله‌دی.
