ګڼ شمېر موټرسایکل چلوونکیو او د دې نقلیه وسیلې کاروباریانو نن سهار د ننګرهار په مرکز جلالاباد ښار کې له یو لاریون وروسته د ولایت مقام مخې ته اعتراضیه خېمه ودروله.
لاریونوالو له رسنیو سره په خبرو کې د ځايي حکومت د هغې پرېکړې خلاف خپل غږ پورته کړ چې لهمخې یې جلالاباد ښار او نږدې ولسوالیو کې د موټرسایکل پر ګرځېدا بندیز لګول شوی.
دا بندیز د تېرې اوونۍ په پیل کې له هغې وروسته لګول شوی چې ننګرهار او په ځانګړي ډول جلالاباد ښار کې موټرسایکل سپرو وسلهوالو د ملکيانو تر څنګ یو شمېر امنیتي سرتېري په نښه کړل.
ننګرهار کې د موټرسایکلو د اتحاديي درې غړي ذبېحالله حقیار،محمدافضل اکاخېل او فولاد کامهوال وايي، حکومت دې د امنیت لهپاره له بنسټیزو لارو کار واخلي، نه دا چې قانوني سند لرونکي وسیلې بندې کړي.
دوی وايي، قانوني اسناد لري، د مالیې او قانوني عوایدو د ورکولو ترڅنګ پهخپله همدې ادارې جواز سیر ورکړی؛ خو بیا یې هم د درېدو مخه نیسي.
دوی زیاتوي، ننګرهار کې شاوخوا ۱۰ زره موټرسایکلې قانوني اسناد لري او دغه راز شاوخوا ۳زره کسان د موټرسایکلو له راواردولو بیا تر جوړولو په بېلابېلو برخو کې پر کار بوخت دي چې د موټر سایکلو له بندېدلو سره ډېر مالي زیان وراوښتی دی.
دغه لاریونوال له حکومته د هغو موټرسایکلې د نیولو غوښتنه کوي چې قانوني اسناد نهلري او دغه راز یې له موټرسایکل چلوونکیو غوښتنه وکړه چې خپلو وسیلو ته اسناد واخلي.
بل پلو د ننګرهار ډېر اوسېدونکي بیا جلالاباد ښار کې د موټرسایکلو پر ګرځېدا له لګېدلي بندیزه خوشاله دي او له حکومته د دوامداره بندیز غوښتنه کوي.
د دوی په وینا، دا چاره د امنیتي پېښو په کمښت کې ډېره اغېزمنه تمامېدلی شي.
د ننګرهار د والي ویاند عطاالله خوږیاڼی بیا ادعا کوي چې د وژنو، ټپيکولو او غلا تر څنګ ډېرې جنايي پېښې موټرسایکل سپاره وسلهوال تر سره کوي؛ ځکه خو یې د لنډ وخت لهپاره پر دغه نقلیه وسیلې بندیز لګولی دی.
د ښاغلي خوږیاڼي په خبره، کله چې وضعیت بېرته ښه او کشفي او نور ارګانونه ډاډمن شي؛ په موټرسایکلو لګېدلی بندیز به لېرې کړي.
د بندو کړل شویو موټرسایکلو چلوونکیو او کاروباریانو د لاریون په پای کې د یو پرېکړهلیک په خپرولو له حکومت غوښتنه وکړه، که پر موټرسایکلو د لګول شوي بندیز حکم بېرته وانهخلي؛ خپلو اعتراضونو ته به دوام ورکړي.
