تشقی ایشلر وزیرلیگی‌نینگ معلوم قیلیشیچه، افغانستان، پاکستان، چین و امیریکه اورته‌سیده‌گی تینچ‌لیک تورت تامانلمه اولتیریشی ایکینی دوری‌دن میزبانلیک قیلیش‌گه یخشی تیارگرلیک آلینگن.
تینچ‌لیک تورت تامانلمه سوزلشوولری بیرینچی دوری پاکستان پایتختی اسلام‌آباد ده اوتکزیلدی و ایکینچی دوریگه کیله‌جک دوشنبه کون (28- جدی) کابل میزبانلیک قیله‌دی.
تشقی ایشلر وزیرلیگی سوزلاوچیسی شکیب مستغنی‌نینگ سلام‌وطندارگه ایتیشیچه، کابل ییغینیده تینچ‌لیک سوزلشوولری ریجه‌سی اوستیگه بحث اوتکزیله‌دی.
جناب مستغنی‌گه کوره، افغانستان تشقی ایشلر وزیرلیگی سیاسی اورین باسری حکمت خلیل کرزی، پاکستان تشقی ایشلر وزیرلیگی اورین باسری اعزاز احمد چودری، افغانستان بوییچه چین‌نینگ خاص نماینده‌سی دینگ شی‌جون و افغانستان بوییچه امیریکه‌نینگ خاص نماینده‌سی اولسن، اوشبو ییغینده اشتراک ایتیش‌لری ممکن.
سیاسی ایش بیلرمان میاگل وثیق‌نینگ ایتیشیچه، اوشبو ییغینده امیریکه و چین مملکت‌لری‌نینگ حضوری، تینچ‌لیک سوزلشوولر منفعتی خصوصیده، امیدوارلیک‌نی کوپه‌یتیره‌دی. اونگه کوره، مذکور مملکت‌لرنی پاکستان‌ده نفوذی بار و نفوذلریدن فایده‌لنیب، پاکستان‌نی طالب‌لرنینگ مذاکره میزی اوستیگه تارتیش خصوصیده ترغیب ایته‌دی.
جناب وثیق‌گه کوره، افغانستان دنیا جماعه‌چیلیگی‌گه ثابت قیلگن کیم، طالب‌لر و تروریست‌لرگه قرشی کوره‌شیش، یالغیز ایچکی اوروش ایمس، بلکیم بو اوروش‌نی باشقه تامانلری هم موجود.
عین حالده، باشقه بیرقطار ایش بیلرمان‌لرگه کوره، افغانستان تینچ‌لیک سوزلشوولری‌ده پاکستان ایکی تامانلمه اویین اوینه‌یدی.
افغانستان رسمی تینچ‌لیک سوزلشوولری، بیرینچی مرته میلادی 2015- ییل باشیده، طالب‌لرنینگ نماینده‌لری حضوریده، اسلام‌آباد ده اوتکزیلدی؛ بیراق اوشبو گروه‌نینگ سابق رهبری ملاعمر اولیمی توغری‌سیده‌گی خبر فاش ایتیلگنی‌دن کیین، بو سوزلشوولر توخته‌تیلدی و کابل‌ده یوزبیرگن قانلی هجوم‌لردن سونگ، افغانستان بیلن پاکستان علاقه‌سی ایلگری‌دن کوره یمان بولدی.
سونگی پیت‌لرده اسلام‌آباد ده اوتکزیلگن آسیا یوره‌گی مملکت‌لری‌نینگ ییغینیده، پاکستان ینه بیر مرته چین و امیریکه نماینده‌لری حضوریده، افغانستان تینچ لایحه‌سیگه یاردم بیریش خصوصیده سوزبیردی.
