قطر باشکینتی دوحه ده ایکی کوندن بویان آمریکا و طالبان گروهی نمایندهلری آرهسیده 7- دور تینچلیک سوزلشوولری باشلنگن و عین حالده، طالبان گروهی افغانستان نینگ تورلی بولیملریده هجوملرینی شدتلنتیرگن.
اوتگن ایکی کونده قندهار، قندوز، بغلان، فراه، بلخ، غور، بادغیس، فاریاب، هرات و سرپل ولایتلری طالبان گروهی جدی هجوملریگه گواه بولگنلر.
حکومت رسمیلری تامانیدن بیریلگن معلومات اساسیده، اوتگن ایکی کونده مدافعه و امنیتی کوچلردن 93 کیشی، مردمی کوچلردن 26 کیشی و طالبان گروهی 78 جنگریسی هلاک ایتیلگن و امنیتی کوچلردن 44 تهسی اسیر آلینگن.
طالبان گروهی خبرنامه نشر قیلیب ادعاقیلیشیچه، ایکی کیچه آلدین قندهار شهری و معروف تومنی اوستیگه اویوشتیرگن هجوملریده امنیتی کوچلردن 57 تهسینی اولدیریب و اشقه 11 تهسینی اسیر آلگنلر؛ بیراق قندهار حاکمی سوزلاوچیسی عزیزاحمد عزیزی نینگ ایتیشیچه، ایکی تاماندن بیریلگن قربانلیک توغریسیده حاضرگهقدر دقیق قولگه کیریتیلمهگن.
شونینگدیک، قندهاردن سونگ، قندوز ولایتی اوتگن ایکی کیچهده طالبان گروهی قانلی هجوملریگه گواه بولگن. قندوز ولایتی نینگ امامصاحب تومنیده چیگره کوچلری گه تیگیشلی بیر پوسته اوستیگه طالبان گروهی تامانیدن اویوشتیریلگن هجوم نتیجهسیده، چیگره کوچلریدن 8 تهسی، محلی پولیسدن 4 تهسی هلاک ایتیلیب و باشقه 26 تهسی اسیر آلینیب و درکسیز یوقالگن.
سلاموطندارگه صحبت بیرگن محلی بیر منبع نینگ ایتیشیچه، بغلان ولایتی نینگ نهرین تومنیده مردمی کوچلرنینگ پوستهلری اوستیگه طالبان تامانیدن اویوشتیریلگن هجوم نتیجهسیده مذکور کوچلردن 24 تهسی هلاک و باشقه 10 تهسی یرهلنگن.
عین حالده، فراه ولایت کینگشی اورین باسری شاهمحمود نعیمی نینگ ایتیشیچه، 7- دور تینچلیک سوزلشوولری باشلهنیشی بیلن اوتگن کیچه قوراللی طالبلر بالابلوک تومنی شیوان قیشلاغیده حربی کوچلرنینگ پوستهسی اوستیگه هجوم قیلگنلر و بو هجوم نتیجهسیده 8 عسکر و 7 طالب هلاک و باشقه ایکی تاماندن 20 کیشی یرهلنگن.
شونینگدیک، غور ولایت کینگشی اعضاسی عبدالحمید ناطقی نینگ ایتیشیچه، مذکور ولایت نینگ تولک تومنی اوستیگه طالبان گروهی تامانیدن اویوشتیریلگن هجوملر نتیجهسیده امنیتی کوچلردن 8 تهسی و طالباندن 10 تهسی هلاک ایتیلگن و باشقه محل یشاوچیلری و امنیتی کوچلردن 15 تهسی یرهلنگن.
بادغیس ولایت کینگشی باشلیغی عبدالعزیز بیک نینگ ایتیشیچه، ایکی کیچه آلدین مذکور ولایت نینگ بندسبزک منطقهسیده طالبان تامانیدن اویوشتیریلگن هجومده 5 پولیس هلاک و باشقه 7 تهسی اسیر آلینگن.
بیراق، اوتگن ایکی کون جریانیده بلخ ولایتیده طالبان گروهی آغیر شکلده قربانلیک بیرگن. بلخ پولیس قومندانلیگی سوزلاوچیسی عادلشاه عادل نینگ سلاموطندارگه ایتیشیچه، اوتگن کیچه یریمیده امنیتی کوچلر شولگره تومنیده طالبان گروهی نینگ باشپناهلرینی هدف قرار بیرگن و نتیجهده مذکور گروه نینگ نیچه قومندانی شامل 48 اعضاسی هلاک ایتیلگن.
عین حالده، طالبان گروهی و امنیتی کوچلر آرهسیده یوز بیرگن آتیشمهلر نتیجهسیده فاریاب ولایتیده 7، سرپل ولایتیده 4 و هرات ده 2 طالب هلاک و باشقه بیرقطاری یرهلنگن.
حربی ایش بیلرمانلرنینگ ایشانچی گه کوره، طالبان گروهی تینچلیک سوزلشوولری جریانیده هجوملرینی شدتلنتیریب و سوزلشوولرده کوپراق امتیاز آلیش اوچون سعی و حرکت قیلهدی.
