سرپل ولایتینینگ اهالیسی امنیتی وضعیت بارهسیده شکایت قیلیب، حکومت حربی قورال اسلحه بیرمهگن تقدیرده، اوزلری طالبلرنی اوشبو ولایتدن چیقاریشنی ایتگنلر.
ولایتنینگ خلقی بوگون (سهشنبه) ییریک ییغین اوتکزیب حکومتنی آگاهلتنیریشلریچه، سرپل وضعیتیگه اعتبار بیریلمهگن حالده، قندوز حادثهسی سرپلده تکرار بولیشی احتمالدن ییراق ایمس. شونینگدیک اولر حکومتدن جنگری طالبلر برابریده معین سیاست اختیار قیلیشنی سورهگنلر.
سرپل قوم یاش اولوغلریدن عبدالحمیدنینگ ایتیشیچه، مملکتده اوروش دوام ایتماقده و نابرقرارلیکلر ایسه اهالی حوصلهسینی پیر قیلگن.
مذکور ولایتنینگ دین عالملریدن شیخ عبدالله، قوراللی طالبلرنی انسان حق و حقوقلری آیاغ آستی قیلگنلیکده عیبلب، اوشبو گروه ولایتنینگ کوهستانات ولسواللیکلریده اهالی بیلن زوروانلیک یولیدن یاندشگن دیگن. اونینگ سوزلریگه کوره، مرکزی دولت سرپل وضعیتی اوچون دییرلی اعتبار قرتمهگن حالده، بو ولایت هم قندوز تقدیریگه اوچهدی.
سرپل پولیس قوماندانلیگی سرپرستی محمدآصف جبارخیلنینگ سلام وطندارگه ایتیشیچه، ولایتنینگ ایریم حدودلری عصیانچی طالبلر تامانیدن تصرف ایتیلیشی ییترلی حربی جهاز و ینه ملی کوچلر بولمهگنی دیر.
جناب جبارخیل، تیزلیکده ولایتگه تازه نفس حربی قوشینلر ییتیب کیلیشینی تیلگه آلیب، جنگریلر طرفیدن تصرف ایتیلگن منطقهلرده حربی تازلهلش عملیات باشلنهدی دیگن. پولیس قوماندانلیگی سرپرستی اوشبو عملیاتده طالبانگه ضد قیام قیلگن اهالی هم اشتراک قیلهدی دیگن.
گزارشلرده، سرپلنینگ کوهستانات ولسواللیکلری جنگریلر تامانیدن تصرف ایتیلگنی باعث علاقهلر ولایت مرکزی بیلن کیسیلیب قالگنی ایتیلهدی.
جاری ییل قوراللی طالبلرنینگ هجومی آشیشیدن کیین، مذکور گروه بوندن اون بیش کون آلدین مملکت شمال شرقیده جایلشگن قندوز شهرینی تصرف قیلییشگه موفق بولدی. ملی کوچلر قندوز کنترولینی قولگه آلیشگه قرهمی، امنیتی مسووللرگه کوره، مذکور ولایتنی تصرف ایتیلیشی قوراللی طالبلرگه روحیه بیرگن دیگنلر. طالبلر اخیرگی وقتلرده بغلان، بدخشان سرپل و فاریاب ولایتلریده هجوملرینی آشیرگن.
