.jpg)
پایتخت کابل سهشنبه کونی (تورتینچی حوت) افغانستانده تینچلیکنی تامینلش اوچون فعالیت آلیب بارهدیگن تورت دولت یعنی افغانستان، پاکستان، امریکا قوشمه ایالتلری و چین دولتلری نمایندهلری اورتهسیده اوتکزیلهدیگن تورتینچی مجلسگه میزبانلیک قیلدی.
بوندن آلدین اوشبو تامانلر ارا اوچته مهم ییغین پایتخت اسلامآباد و کابلده اوتکزیلگن ایدی. بوندن آلدین پاکستان باش کینتی اسلامآباد شهریده بولیب اوتگن ییغینده تامانلرنی افغانستانده تینچلیکنی تامینلش بارهسیده یول خریطهسی اوستیده کیلیشلگنلیکلری ایتیلهدی.
رسمی کابل تورت تمانلمه اوچرهشوولرنینگ تورتتینچی دور ییغینیده رسمی کابل نمایندهلری بیلن طالبلر اورتهسیده باشلنهدیگن احتمالی مذاکرهلرنینگ تاریخی و جایی اوستیده کیلیشیب آلیشلریگه امیدوار کورینهدی. کابل رسمیلری سونگی چاغلرده پاکستان دولتینی افغانستانده برقرارلیک اورنهتیش مقصدیده دولت بیلن طالبلر اورتهسیده مذاکرهلر باشلنیشی اوچون ایجابی رول اوینب کیله یاتگنیدن منتدار ایکنینی اظهار ایتگن.
افغانستان تامانی رسمی روشده مذاکرهلر باشلنمسدن آلدین شرط ـ شرایطلر اورته گه قوییلمسلیگینی تاکیدله گن. تورت تامانلمه ییغین اشتراکچیلرینی هم اوشبو مساله اوستیده کیلیشیب آلگنلیکلری ایتیلهدی.
افغانستان معماسینی تینچ یوللر آرقهلی برطرف ایتیش اوچون حاضرگچه بوکونگی دیک یخشی شرایط وجودگه کیلمهگن.
امریکا قوشمه ایالتلری همده پاکستان افغانستان مسالهسی دخلدار مهم تامانلردن حسابلنهدی.
پاکستاننینگ طالبلر حرکتیگه بولگن نفوذی همده امریکانینگ رسمی اسلامآباد بیلن اوزاق مدتلی علاقهلری و ستراتیژیک دوستلیگی قاله بیرسه چیننینگ پاکستان بیلن علاقهلری نظرده توتیلگنده اوشبو دولتلر همکارلیگی آرقهلی افغانستانده تینچلیک اورنهتیش امکاندن ییراق کورینمهیدی.
.jpg)
بوندن آلدین افغانستان و طالبلر ارا اوتگن ییلی باشله تیلگن مذاکرهلر طالبلر سابق رهبری ملاعمر اولیمی اعلان ایتیلیشی بیلن توختب قالگن ایدی. طالبلر تامانی هلی گچه تینچلیک مذاکرهلری بارهسیده رسمی بیر شکلده عکسالعمل بیلدیرمهگن.
بوندن تخمیناً بیر آی آلدین پگواش تشکیلاتی تشبثی بیلن بیرلشگن عرب امیرلیکلریده نا رسمی روشده طالبلر وکیللری بیلن بیر قطار افغانلر اورتهسیده اوچرهشوولر اوتکزیلگن ایدی. ایتیلیشیچه طالبلر مذکور اوچرهشووده رسمی کابل بیلن مذاکره اوتکزیشلری اوچون ینه بیر بار آلدینگی شرطلرینی بیان ایتگنلر. اولر مذاکرهلر باشلنمسدن آلدین چیت ایللیک حربی کوچلرنی افغانستاننی ترک ایتیشلری همده طالبلر رهبرلری آتلرینی ترورچیلرنینگ قاره رویخطیدن آلیب تشلنیشینی سورهگنلر.
افغانستان دولتی قاله بیرسه تورت تامانمله ییغین آدرسیدن بو توغریده عکسالعمل بیلدیریلمهگن.
هر حالده بوکون افغانستان دولتی و ملتی تورت تامانلمه ییغین اشتراکچیلری تامانیدن آلیب باریلهدیگن سعی و حرکتلر افغانستانده تینچ برقرار ایتیش اوچون ینگی افقلر آچیشیگه امید باغله ماقدهلر. کابل ییغینیده طالبلر بیلن افغانستان دولتی نمایندهلری اورتهسیده تینچلیک مداکرهلری اوتکزیش بارهسیده معین نتیجهلرگه ایریشلیشی اوشبو امیدلرنی ینه بیر مرته کوچهیتیریشی ممکن.
افغانستان خلقی همده دولتی اوچون کیلهجک مذاکرهلرده اوتگن اون اوچ ییل دوامیده افغانستان خلقیگه نصیب ایتگن مهم یوتوقلر جملهدن سوز ایرکینلیگی، سیلاولر همده انسان حقلری کبی مسالهلرنی تینچلیک بهاسیگه قربان ایتیلمسلیگی مهم سنهلهدی. افغانستان رهبرلری جملهدن جمهور رییس محمداشرف غنی بو بارهده بار بار تاکیدلهگن.
.jpg)
یقینده افغانستان دولتی تینچلیک عالی کینگشی هم بعضی بیر اوزگریشلر کیریتیب مذکور کینگش رهبریتیگه ینگی چهرهلر و سیمالرنی تعیینلهدی. اوشبو کینگش بوندن آلدین تینچلیک یونهلیشیده بیرار بیر ایجابی فعالیت آلیب بارالمهگنی اوچون جدی تنقیدلرگه روپهره بولیب کیلگن.
سابق جهاد رهبرلریدن افغانستان اهالیسینینگ معین بیر قسمیگه اوز نفوذی و تاثیریگه ایگه بولگن روحانی شخص پیر سید احمدگیلانینی مذکور کینگش رهبری ایتیب تعیینلنیشی هم دقت سزاوار بیر مساله. جناب گیلانینی پاکستان دولتی همده پاکستاندهگی ایریم سیاسی تیورهکلر بیلن یقین علاقهده بولگنی ایتیلهدی.
افغانستان دولتینی پیر گیلانینینگ پاکستان قاله بیرسه منطقه و دنیانینگ ایریم دولتلری بیلن مناسبتینی نظرده توتیب اونی تینچلیک عالی کینگشی رهبریتیگه تعیینلهگن بولیشی احتمالی موجود. افغانستان تینچلیک عالی کینگشی نینگ قیته جانلهنیشی و ینگی رهبریتی بیلن تینچلیک یونهلیشیده فعال بولیشی تورت تامانمله ییغین تامانیدن آلیب باریلهدیگن سعی و حرکتلرگه کومکچی بولیشی ممکن.
افغانستان دولتی تینچلیک مذاکرهلرینی بهار موسمی ییتیب کیلمسدن آلدین تیزراق باشلهنیشی اوستیده تاکیدلب کیلماقده. رسمی کابل یاز موسمیده افغانستانده طالبلر هجوملرینینگ ینگی بیر دوری باشلنیشیدن خواطرده. افغانستانده ینگی اوروشلر باشلنگن تقدیرده تینچلیک مذاکرهلری باشلنیشی کیچیکیشی قاله بیرسه اوشبو جریاننی ینگی معمالرگه روپهره قیلیشی ممکن.
.jpg)
افغانستان دولتی و باشقه بیر قطار تامانلر مذاکرهلر تیز کونلرده باشلهتیلیب تامانلر ارا زوراوانلیکلر میزانی کمهییشی ضرورتی اوستیده تاکیدلهیدیلر. افغانستان دولتی همده طالبلر تامانینی شوکیچه کونلرده تینچلیک مذاکرهلرینی قیته باشلش اوچون سعی و حرکتلر دوام ایتهدیگن بیر زمانده ینگی اوروشلر اوچون تیارگرلیک کوره باشلهگنلر.
تورت تامانلمه مجلس اشتراکچیلری ینگی توقنهشوولر باشلنمسدن دولت همده طالبلر اورتهسیده مذاکرهلرنی اوتکزیش گه مؤفق بولگنلریده افغانستانده تینچلیک اورنهتیشلیککه بیر قدم یقینلشگن بولهدیلر.
