مملکت شمالی‌ده حربی رسمی‌لر، تخار ولایتی‌نینگ خواجه‌غار تومنی‌نی طالب‌لردن تازه‌لش عملیات باشلنگنی‌دن خبر بیره‌دی.
عملیات (سه‌شنبه کون) ایرته‌لب باشلنگن، ضربتی گروه عسکرلری و کماندو کوچلری بیرینچی خط‌ده قرار تاپگن.
اوشبو رسمی‌لرنینگ ایتیشیچه، امنیتی کوچلر حاضرگچه اوچ کیلومتر ایلگری بارگن. اولرگه کوره، طالب جنگری‌لری برچه توانی بیلن امنیتی کوچلرگه قرشی کوره‌شه‌دی، آغیر و یینگیل قورال و تک انداز بیلن حربی کوچلرنی نشان‌گه آله‌دی.
تخارده ضربتی کوچلر قومندانی جنرال شعورگل‌نینگ ایتیشیچه، سه‌شنبه کونگی اوروش‌ده 18 طالب هلاک بولگن و طالب‌لر هلاک بولگن‌لرنینگ جان‌سیز تنه‌سینی قندوز ولایتی دشت ارچی تومنی‌گه آلیب کیته‌دی. شونینگ‌دیک جناب شعورگل‌گه کوره، حاضرگچه حربی کوچلردن 7 ته‌سی یره‌لنگن و اوروش خواجه‌غار تومنی «اورازبچه» قیشلاغی‌ده جدی شکلده دوام ایتماقده.
خواجه‌غار تومنی‌ده طالب‌لرگه قرشی اوروشه‌دیگن عسکرلرنینگ ایتیشیچه، بو اوروش یوتوقلی بولیشی‌گه ایشانه‌دیلر.
قندوز شهری طالبان نظارتی‌گه اوتگنی‌دن کیین، اوشبو گروه اعضاسی تخار ولایتی‌نینگ خواجه‌غار، ینگی‌قلعه و اشکمش تومن‌لری‌گه هجوم اویوشتیردی و 12 ساعت، تخار ولایتی خواجه‌غار تومنی‌نینگ مرکزی‌نی نظارت‌گه آلدی.
اوشبو شهرده محل رسمی‌لریدن بیرقطاری‌نینگ اویلری و دولتی بنالر اوتکه یاندیریلگن و آغیر تلفات کورگنی‌دن کیین، شهردن قاچیب چیقگن‌لر؛ بیراق تخارده حربی رسمی‌لرنینگ معلوم قیلیشیچه، طالب‌لر تخارنی برچه منطقه‌سیده تیزلیک‌ده اینگیلیشی ممکن.
