تخار ولایتیده طالبان گروهی فعالیتی کینگه‌یگنی و اوشبو گروه گه قرشی حربی عملیات یولگه قوییلمه‌گنی، مذکور ولایت یشاوچیلرینی خواطرگه سالگن.
تخار یشاوچیلری‌نینگ ایتیشیچه، اوشبو ولایت‌نینگ اشکمش و کوکچه اطرافیده‌گی تومنلریدن قوراللی طالب‌لرنینگ جنگریلری نابود ایتیلمه‌گن و بو گروه کیله‌جک کوکلم موسومی‌ده کوپینچه منطقه‌لرنی نظارت گه آلیشی ممکن. اولر، طالب‌لرگه قرشی حربی عملیات شدت‌لنتیریشی‌نی طلب قیله‌دیلر.
تخار ولایتی‌نینگ 5 تومنی‌ده طالب‌لر کینگ شکلده فعالیت قیله‌دی و شونینگ‌دیک، باشقه نیچه تومن امنیتی تهدید آستیده تورگن. شونده‌ی بیرحالده، کوکچه اطرافیده‌گی تومنلرده طالب‌لرگه قرشی یولگه قوییلگن حربی عملیات نیچه کوندن بویان توخته‌تیلگن.
تخار پولیس قومندانلیگی سوزلاوچیسی خلیل اسیر، مذکور تومنلرده حربی عملیات توخته‌تیلگنی توغریسیده هیچ نرسه دیمه‌یدی، بیراق قوراللی طالب‌لرنینگ هجوملرینی آرقه‌گه اوروش اوچون امنیتی کوچلر ییترلیچه تیارگرلیک آلگنیدن خبر بیره‌دی.
تخار ولایتی‌نینگ ینگی‌قلعه، درقد، خواجه بهاءالدین، خواجه‌غار و اشکمش تومن‌لری، ناتینچ منطقه‌لردن سنله‌دی. اوشبو ولایت یشاوچیلریگه کوره، مذکور تومنلرده طالب‌لرگه قرشی هیچ بیر حربی عملیات جدی و دواملی شکلده یولگه قوییلمه‌گن.
