تخار ولایتیده اسلامی حزب و جمعیت حزبینینگ ایکی قومندانی اورتهسیده روی بیرگن توقنهشوو نتیجهسیده، جمعیت حزبینینگ بیر اعضاسی اولگن و باشقه ۴ نفری یرهلنگن.
تخار امنیتی رسمیلرینینگ ایتیشیچه، گلبدین حکمتیار رهبرلیگیده اسلامی حزب قومنداندانلریدن حسین جنبی و اسلامی جمعیت حزبینینگ قومندانلریدن فیضالله ارا بوگون ایرتهلب ساعت ۴ ده ولایت چاهآب تومنینینگ تخنآباد منطقهسیده اوروش قیلگنلر.
تخار پولیسینینگ امنیت آمری سیدجهانگیر کرامتنینگ سلاموطندارگه ایتیشیچه، حاضرگه قدر جمعیت حزبیدن بیرکیشی جان بیرگن و باشقه ۴ کیشی یرهدار بولگن و اسلامی حزبیدن ایسه ایکی کیشی یرهلنگن.
بیراق سنا مجلسیده گی خلق نماینده سی افضل شامل نینگ سلام وطندارگه ایتیشیچه، اوروشده اسلامی حزب هوادارلریدن ۵ کیشی جان بیرگن و قومندان حسین جنبی ایسه یره لنگن.
باشقه بیر تاماندن حادثه شاهدلرینینگ ایتیشیچه، اوروش میدانیده ۱۰ جسد قالگن و حاضرگه قدر قیسی حزبگه تیگیشلی ایکنلیگی انیق بولمهگن.
اوروش جریانیده بیر مکتب ساختمانی هم نورهب توشگن.
ایتیش کیرهک جاری هفته شنبه کونی تخار ولایتینینگ چاهآب تومنیده اسلامی حزب هوادارلری بیلن اسلامی جمعیت اعضالری ارا روی بیرگن بیرینچی توقنه شووده، اسلامی حزب هوادارلری جمعیت اعضالریدن ۲۲ تهسینی آتگن ایدی.
حادثه روی بیرگن کونی تخار امنیتی رسمیلری وضعیتنی تیکشیریش اوچون چاهآب تومنیگه بیر هیأت یوبارگن ایدی، بیراق ینه بوگون اسلامی جمعیت حزبی نینگ شنبه کونگی حادثهده اولگن اعضالری خانهدانی ولایت ساختمانی ایشیگیده تحصن قیلیب حادثه جدی تیکشیریشلرینی سورهگن ایکن.
