امریکه قوشمه ایالتلری پاکستان حکومتیدن توپراغیده جایلشگن جلالالدین حقانی ترماغیگه قرشی جدی تدبیر آلیشنی سورهگن.
امریکه جمهور رییسینینگ ملی خوفسیزلیک مصلحتچیسی سوزان رایسنینگ پاکستانگه خطاب قیلیب ایتیشیچه، افغانستانده صادر ایتیله دیگن خودکش هجوملر پاکستان توپراغیده حقانی ترماغی تامانیدن پلانلشتیریلیشی، مملکتی اوچون تن آلینمیدیگن بیر مساله.
اوتگن کون پاکستانگه بارگن خانم رایس، بو مملکت بلند مرتبهلی رسمیلری بیلن بیر خبری ییغینده اشتراک قیلیب تاکیدلهشیچه، رسمی کابل بیلن اسلام آبادنینگ علاقهسی امریکه اوچون جوده مهم دیر. او، مذکور اوچرهشووده پاکستان باش وزیریدن تیزلیکده واشنگتنگه سفر قیلیشنی سورهگن.
شونینگدیک امریکهلیک بلند مرتبهلی ملازم، پاکستاننینگ شمالی وزیرستانده حقانی ترور ترماغینی نابود قیلیش اوچون «ضرب عضب» ناملی عملیات بارهسیده شک و تردید بیلدیریب، پاکستان دولتی اوشبو عملیاتده حقانی ترماغی نابود ایتیلیشی اوچون جدی سعی وحرکت قیلمهگن لیگینی بیلدیرگن.
گزارشلرگه کوره، امریکهلیکلرنینگ پاکستانگه نسبتن شک وتردیدی کابلنینگ شاهشهید منطقهسیده صادر ایتیلگن خودکش هجومدن سونگ ایشانتیرگن. امریکه مذکور هجوم اوچون حقانی ترور ترماغینی عیبدار بیلگن.
امریکه جمهور رییسی نینگ ملی امنیت مصلحتچیسی اوشبو سفرده شاهشهید هجومینی ایسلب، بو توغریده تشویش بیلدیرگن.
پاکستان نینگ شمالی وزیریستانده حقانی ترور ترماغیگه قرشی باشلهگن حربی عملیاتلری اوز پایانگیه ییته یاتگن بیر پیتده افغانستانده نا برقرارلیکلر میزانی آشگن. ایتیلیشیچه، مملکت ترورچیلیک هجوملر میزانی آرتگن.
عین حالده، بوندن نیچه وقت آلدین امریکه دولتی پاکستان حکومتیگه کورسته دیگن ییریک یاردملریدن بیر قسمینی کیسیب قویدی. مذکور قرار پاکستان حکومتی حقانی ترور ترماغیگه جدی صورتده قرشی کورشمهگن لیگی سبب آلینگن.
ایتیلیشیچه، پاکستان حکومتی شمالی وزیرستانده ترورچیلرگه جدی قرشی کورهش آلیب بارمهگنی اوچون امریکه بو مملکتدن ناراض. چونکه اصلی مرکزی شمالی وزیریستانده جایلشگن حقانی ترور ترماغینینگ مرکزی هنوزگچه بوتونلی نابود ایتیلمهگن.
هر ییلی میلیاردلب دالر ترورچیلیککه قرشی کورهشیش اوچون پاکستان دولتیگه امریکه تامانیدن بیریلردی، اما «دان» کونده لیگینینگ یازیشیچه، پاکستان حکومتی نینگ ایریم بلند مرتبهلی رسمیلری امیریکه مدافعه وزیرلیگی واشنگتنده پاکستان ایلچیسیگه مذکور یاردملر 2015- ییلدن سونگ کیسیب قویلهدی.
پاکستاننینگ شمالی وزیریستان حدودی ترورچیلرنینگ اصلی مرکزلریدن سنهلهدی. افغانستانده ناتو همده افغان ملی کوچلری مقابلیده اوروش آلیب بارهدیگن عصیانچیلرنینگ بیرچهسی اوشبو مرکزده تربیهلهنیب افغانستانگه یوباریله دیلر.
