جمهورلیک ریاست سیلاوی نینگ کمپاینلری باشلنگنیدن 20 کوندن کوپراق بولماقده، لیکن تخار مرکزی تالقان شهریده جمهور رئیس و دولت قورووچی تیم باشلیغی محمداشرف غنی نینگ صورتلریدن باشقه جمهورلیک ریاست نامزدلری نینگ صورتلری کورینمهیدی. بیراق جمهور رئیس غنی نینگ بوتون صورتلری ناتانیش کیشیلر تامانیدن ییرتیلگن، افلاسلنتیریلگن و شونینگدیک، اوتگه تارتیلگن.
تخار ولایتیده محمداشرف غنی نینگ کمپاین دفتری اورین باسری میرویس شریعتمداری نینگ ایتیشیچه، تالقان شهریده دولت قورووچی تیم دن هیچ بیر توزوک صورت قالمهگن و بو ایش عامللری تانیلیشی خصوصیده بولگن سعی و حرکتلر هم نتیجهسیز قالگن.
اونگه کوره، دولتی ادارهلر اینیقسه پولیس قومندانلیگی و خوفسیزلیک ریاستی گه یقین ریکلام تابلولریدن کوپینچهسی هم کوتریلگن، بیراق خوفسیزلیک مسؤوللری بو توغریده خبرسیزلیک بیلدیریشهدی.
تخار ولایتی نینگ مدنی فعاللریدن بیری بشیراحمد بشار، بو ایشنی قارهلب ایتیشیچه، جمهور رئیس غنی بیش ییللیک حکومتی جریانیده تخار ولایتی نینگ خوفسیزلیگی، اقتصادی و اجتماعی وضعیتی گه دقت قیلمهگنی باعث، اهالی اونگه قدر عقده آلگن.
بیراق، تخار خوفسیزلیک رسمیلری نینگ ایتیشیچه، جمهور رئیس غنی نینگ صورتلری ییرتیلگنینی اجتماعی ترماقلردن خبر بولیشگن و عامللرینی قولگه آلیش اوچون سعی و حرکت قیلیشهدی.
اوتگن نیچه هفته ده تالقان شهری نینگ ایریم قسمتلریده دولت قورووچی تیمی نینگ نیچه دفتری فعالیت گه باشلهگن و تخارده باشقه نامزدلرنینگ کمپاینلریدن هیچ بیر خبر یوق دیر.
