سیلاولرگه اصلاحات کیلتیریش خصوصیدهگی جمهور رییس غنینینگ تقنینی فرمانی ایکینچی مرته نمایندهلر کینگشی تامانیدن رد ایتیلدی. تحلیلچیلردن بیرقطارینینگ ایتیشیچه، حکومت و نمایندهلر کینگشی قانونی ایمس دیر، بیراق شخصی منفعتلرینی تأمینلش اوچون ناقانونی فعالیتلریدن دفاع قیلهدیلر. اوشبو تحلیلچیلرنینگ ایتیشیچه، حاضرگی شرایطده جمهور رییسنینگ تقنینی فرمانی رد ایتیلیشی منطقی ایمس و هیچ بیر تاماننینگ منفعتیگه بولمهیدی.
حقوقی ایش بیلرمانلردن بیری کبیر رنجبرنینگ ایتیشیچه، اوشبو تقنینی فرمان رد ایتیلیشی حاضرگی شرایطده منطقی ایمس. جناب رنجبرگه کوره، تقنینی فرمان نمایندهلر کینگشی تامانیدن رد ایتیلیشی کینگشنینگ اوزیگه جدی زیان ییتکیزهدی.
جناب رنجبر، جمهور رییسدن تقنینی فرماننی قانون ریجهسی اساسیده، نمایندهلر کینگشیگه یوباریشینی سورهدی. اونینگ ایتیشیچه، جمهور رییس، اوشبو ریجهنی یوبارگن بیرچاغیده، حکم صادر ایتسه و فرمان قیتهدن رد ایتیلگن تقدیرده، مجلس توختهتیلسه.
حقوقی ایش بیلرمانلردن باشقه بیری طاهر هاشمینینگ سلاموطندارگه ایتیشیچه، ملی بیرلیک حکومت و نمایندهلر کینگشی، اوز منفعتلری اوچون اویلهیدی، خلق منفعتی اوچون ایمس.
جمهور رییسنینگ تقنینی فرمانی رد ایتیلگن صورتده، سیلاولر یولگه قوییلیشی آرتده قالیب و حکومت بیلن نمایندهلر کینگشینینگ ایشی دوامی اوچون بهانه بولهدی.
جناب هاشمیگه کوره، ملی بیرلیک حکومت رهبرلری و نمایندهلر کینگشی، قدرتلرینی سقلش اوچون ناقانونی موقفیدن دفاع قیلهدی.
عین حالده، مملکت یشاوچیلریدن بیرقطارینینگ ایتیشیچه، مذکور فرمان رد ایتیلگنیدن کیین، نمایندهلر کینگشینینگ اعضالری، خلق حضوریدهگی ایشانچلرینی قولدن بیرگنلر.
شونینگدیک، جمهورلیک ریاستی سوزلاوچیسی اورین باسری شاه حسین مرتضوینینگ سلاموطندارگه ایتیشیچه، حکومت نمایندهلر کینگشیدن کیلهجک سیلاولر تیزلیکده یولگه قوییلیشی خصوصیدهگی تقنینی فرمان رد ایتیلیشی ایمس، بلکیم تصدیقلنیشینی کوتردی.
مرتضویگه کوره، حاضر حکومت سیلاولر تیزیمیگه اصلاحات کیلتیریش اوچون سونگی آدیملر خصوصیده، سیاسی حزبلر و باشقه ادارهلرنینگ اعضالری بیلن بحث قیلماقده.
تقنینی فرمان رد ایتیلگنیدن کیین، جمهور رییس غنی بیر خبرنامه ترقهتیب ایتیشیچه، نمایندهلر کینگشی تامانیدن تقنینی فرمان رد ایتیلیشی، سیلاولر تیزیمیگه اصلاحات کیریتیش ایشیگه قرشی جدی ضربه بولگن. عین حالده، اونینگ اورغولشیچه، حکومت نمایندهلر کینگشی بیلن تومنلر کینگشینینگ سیلاولری یولگه قوییلیشی خصوصیده، توانی باریچه سعی و حرکت قیلهدی.
