جمهور رییس محمد اشرف غنینی قوم پرستلیککه عیبلهگن جمهور رییس بیرینچی اورین باسری عبدالرشید دوستم تنقیدلرگه اشاره قیلگن بیر قنچه سیاسی تحلیلچیلر، مملکتده حاضرگی بحران ملی بیرلیک حکومتی رهبرلری اورتهسیده بولگن ضدیتلردن کیلیب چیقهدی دیگنلر.
اوتگن کیچه شبرغان شهریده خبری انجمنده سوزلهگن جناب دوستم، غنی وعبدالله نی قوم پرستلیککه عیبلهدی. جنرال دوستم حکومت بدنیدهگی کجروش سیاستلردن بوتونلی خبر ایکنلیگینی ایتگن.
بیر قنچه سیاسی تحلیلچیلر، جناب دوستم نینگ بو قبیل موضعگیرلیگی حکومت باشلیغلر اورتهسیده قومی اوزیلیشلر همده جدی جنجاللر بارلیگینی بیلدیرهدی دیگنلر.
سیاسی تحلیلچی جاوید کوهستانی نینگ سلاموطندارگه ایتیشیچه، جمهور رییس غنینی قوم پرستلیگی بوندن آلدینلر هم سیزیلگن لیگینی تیلگه آلیب، اما بو قبیل جدی صحبتلر سابقهسی بولمهگن پیمانهده آشگن لیگینی ایتگن.
قومی قرمه قرشیلیک بارهسیده آگاهلنتیرگن جناب کوهستانی، هلمند، فاریاب و قنندوز ولایتلری نینگ کته قسمی جنگریلر طالبلر قولیگه اوتیشی قومی سیاستلر نتیجهسیدن کیلیب چیقهدی دیدی.
باشقه بیر سیاسی تحلیلچی یونس فکور ملی بیرلیک حکومتی رهبرلری نینگ قومگرالیک کسللیگیگه چلینگنلیکلرینی تیلگه آلگن. ملی بیرلیک حکومتی رهبرلری هر بیری اوز اطرافلریدهگیلرنی ایشگه اورنهتیش اوچون سعی وحرکت قیله دیلر دیگن جناب فکور.
جناب فکور، ملی بیرلیک حکومتی رهبرلریگه قومی مسالهلرنی ایلگری سوریش اورنیده مملکتده امنیت تامین بولیش فکریگه توشیشلرینی سورهگن.
نمایندهلر مجلسی نینگ سابق اعضاسی سردارمحمد رحمن اوغلی، جناب دوستم سوزلری عملده بارلیگینی ایتیب، جمهور رییس غنینی اصلاحات کیلتیریش اوچون عملده ایش قیلمهگنلیکده عیبدار بیلگن. جناب رحمن اوغلی، جمهور رییس غنی هیچ بیر زمان بیرینچی اورین باسر سوزلریگه اعتبار بیرمهگن دیدی.
عین حالده، جمهور رییسلیک سرایی تامانیدن اخبارات واسطهلریگه یوباریلگن خبرنامهده جمهور رییسنینگ بیرینچی اورین باسری حکومت نینگ بلند مرتبهلی ملازمی صفتیده بو قبیل سوزلری حاضرگی شرایط اوچون قرشی دیگن.
