د دولت مرکچي پلاوي سلاموطندار ته ویلي چې د ناڅرګندو لاملونو له کبله بینالافغاني خبرې اترې چې ټاکل شوې وه د زمري میاشتې په ۲۶مه په دوحه کې پیل شي، ځنډېدلې دي.
د دولت د مرکچي پلاوي غړیو غلامفاروق مجروح او حبیبې سرابي سلاموطندار ته ویلي چې د ناڅرګندو لاملونو له کبله د دولت او طالبانو ترمنځ د سولې مخامخ خبرې اترې چې ټاکل شوې وه روانه اوونۍ په دوحه کې پیل شي، ځنډېدلې دي. دوی دا چې یادې خبرې اترې به بېرته کله پیل شي، نه پوهېږي.
د دولت مرکچي پلاوی له طالب ډلې سره د مخامخ خبرواترو د ځنډېدو په اړه جزیات نه ورکوي، خو تمه لري چې راتلونکې اوونۍ به دوحې ته ولاړ شي.
دا په داسې حال کې ده چې طالبانو د یوې اعلامیې په خپرولو سره ویلي چې حکومت د بینالافغاني خبرواترو د پیل پر وړاندې خنډ جوړوي.
د ملي مصالحې شورا رییس عبدالله عبدالله نن د سولې له مرکچي پلاوي سره په لیدنه کې وویل چې د دولت مرکچي پلاوی به په بشپړ ملاتړ، واحد نظر او لازمې همغږۍ د خبرواترو مېز ته کېني. نوموړي د مرکچي پلاوي فعالیت، همغږي او پلانجوړونه «هیلهبښونکي» بللي دي.
ټاکل شوې وه بینالافغاني خبرې اترې د ۴۰۰ طالب بندیانو له خوشې کولو درې ورځې وروسته پیل شي، خو طالبانو ویلي چې یادې خبرې اترې به د زمري میاشتې په ۲۶مه په قطر کې وشي.
د سولې په چارو کې د دولت وزارت تر اوسه د سولې خبرواترو د ځنډ په اړه څه نه دي ویلي.
