افغانستان حکومتی بلند مرتبه‌لی رسمیلری‌نینگ ایتیشیچه، بوگون یوز بیرگن ییر قیمیرلش‌ده حیات‌دن کوز یومگن‌لر سانی 34 کیشی و یره‌لنگن‌لر سانی ایسه 180 نفرگه ییتگن.
شونینگ‌دیک پاکستان دولت تلویزیونی‌نینگ اعلان قیلیشیچه، اوشبو ییر سیلکنیش‌ده 90 نفر عالم‌دن اوتگن و 600 انسان ایسه تن جراحتی آلگن.
ییر قیمیرلش کوچی 7.7 درجه ریشتر بولگنی تخمین ایتیلگن. مذکور طبیعی حادثه بوگون توشدن سونگ ساعت 1:30ده افغانستان و منطقه مملکت‌لرینی تیتیرتدی.
اوشبو ییر قیمیرلش مرکزی بدخشان ولایت مرکزی فیض آباد شهری جنوب شرقی نینگ 70 کیلومترلیگی‌ده بولیب، ییرنینگ200 کیلومتر چقورلیگیده روی بیرگن.
ایش بیلرمانلرگه کوره، اوشبو ییر قیمیرلش چقورلیک مرکزی ییر سطحی‌ده بولگن‌ده ایدی، بوندن آرتیق تلفات یوز بیریشی ممکن ایدی.
حکومت اجراییه باشلیغی داکتر عبدالله عبدالله شاشیلینچ حالت کمیته‌سی فوق‌العاده ییغینی‌ده، ییر قیمیرلش اوتگن اون ییلده سابقه سیز دیگن.
بدخشان ولایت‌نینگ محلی بلند مرتبه‌لی رسمیلری، مذکور طبیعی حادثه‌ده 1400 اوی ویران بولگن لیگینی ایتگن‌لر.
جمهور رییس‌لیک سرایی بیر خبر نامه ترقه‌تیب، اوشبو واقعه‌ده زیان کورگن‌لرگه یاردم ییتکزیب بیریلیشی اوچون جمهور رییس‌غنی مخصوص کمیته ایجاد ایتیلیشی‌گه بویروغ بیرگنی ایتیلگن.
حادثه ده قربان بولگن‌لر عایله‌سیگه قیغوداشلیک بیلدیرگن جمهور رییس‌غنی دولت‌نینگ برچه اداره‌لر تیارحالت‌ده تورگن دیگن. شونینگ‌دیک افغانستان ساغلیق‌نی سقلش وزیرلیگی‌گه یره‌لنگن‌لر درمانله‌نیش اوچون جدی صورتده همکارلیک قیلینیشی تاکیدلنگن.
هنوزگچه بوگون ییر قیمیرلش عاقبتی‌ده زیان کورگن‌لر اوچون اروپا اتفاقی، ترکیه و هندوستان همکارلیک قیلیش اوچون تیارگرلیک کورستگن. شونینگ‌دیک هندوستان باش وزیری مملکتی نینگ بلند مرتبه‌لی رسمیلریگه حادثه‌ده زیان کورگن‌لر انیق له‌نیب انسان پرورانه یاردم ییتکزیب بیریلیشی اوچون تاکیدله‌گن.
عین حالده، افغانستان‌ده بیرلشگن ملت‌لر تشکیلاتی نینگ مخصوص نماینده‌سی نیکولاس هیسم مذکور حادثه اوچون قیغوداشلیک بیلدیرگن.
