د بوکوحرام وسله والې ډلې تېره جمعه ۱۶ تنه د نایجریا په شمال ختیځ کې په یوه کلي کې ووژل.
تلګراف ورځپاڼې د کیمبا کلي د اوسېدونکو د پېښې عیني شاهدانو له قوله لیکلي دي، چې د بوکو حرام جهادي ډلې د شپې په ۱۰ بجو په بایسکلونو سپاره راغلل او پر دغه کلي یې برید وکړ.
د عیني شاهدانو په خبره، بوکوحرام وسله والې ډلې وروسته له هغې چې کلی یې کلا بند کړی وو، د تللو پر مهال یې پر ولسي خلکو ګولۍ وورولې او کورونو ته یې اور ورته کړ.
د سیمې خلکو وروسته له هغه چې برید ګر له سیمې ولاړل رسنیو ته ویلي دي، چې په دغه برید کې ۱۶ تنه وژل شوي او ګومان کېږي، چې ۶ تنه مېرمنې یې هم له ځانه سره تښتولي دي.
د دې برید دلیل تر اوسه پورې معلوم شوی نه دی، خو ګومان کېږي، چې دغې ډلې د دې له پاره په هغه کلي برید کړی وي، چې ګواکې ماشومان یې ښوونځیو ته تللي وي.
بوکوحرام یا " الجماعة أهل السنة للدعوة والجهاد " یوه اسلامي وسله واله افراطي ډله ده، چې په ۲۰۰۲ م ز کال کې د محمد یوسف له خوا جوړه شوه.
دغه ډله په سیاسي او ټولنیزو فعالیتونو کې د مسلمانانو ګډون لکه د رایې ورکول او ښوونځي ته تلل حرام ګڼي.
دوی په ناجریا، چاد او د کامرون په شمال کې فعالیت کوي.
بوکوحرام له دې مخکې له القاعدې سره اړیکه لرله او په دې وروستیو کې د داعش وسله والې ډلې له مشر اوبوبکر البغدادي سره بیعت کړی دی او د دوی د فعالیت سیمې ته یې د اسلامي دولت د لویدیځې افریقا ولایت نوم ورکړی دی.
د امریکا متحده ایالانو په ۲۰۱۳ م ز کال کې دغه ډله په تورلیست کې شامله کړه.
