مدنی بیر اداره نینگ یقینده آلیب بارگن تیکیشروو نتیجه سیده ییل نینگ مالی بودجه لایحه سیده بیرینچی باسقیچ ده ولایتلر و ولسوالیکلر نظرده توتیلیشی سورهلگن.
بدیل سبز ناملی مدنی اداره نینگ رییسی مجتبی پیکان نینگ بوگون بیر خبری انجمنده ایتیشیچه، ییل نینگ ملی بودجه لایحه سیگه دستلب ولایتلر محلی بلند مرتبهلی رسمیلری نینگ نظرلری سیغدیریلیشی، اولرنی لایحهلر عملگه آشیریلیشی اوچون کومک قیلهدی. جناب پیکان، مرکز و ولایتلر محلی رسمیلری اورته سیدهگی ضعیف علاقه بودجهنی توزیش اوچون تورلی معمالرنی یره تیشگه سبب بولگن لیگینی بیلدیرگن.
عین حالده، جمهور رییس غنی نینگ یخشی حکومتچیلیک و اصلاحات کیلتیریش بوییچه مخصوص نماینده سی احمدضیا مسعود بودجه نینگ 40 فایزی ولایتلرده صرفله نیشینی وعده بیرگن.
جناب مسعود، ولایتلردهگی لایحهلرنی تطبیق قیلیش اوچون ولایتی کینگشلر همده ولسوالیکلر مسوول ایکن لیکلرینی ایتگن. مدنی تشکیلاتلردن بیری نینگ ینگیدن قولگه کیریتگن معلوماتیگه کوره، ینگی ییل مالی بودجه ریجه سیگه بیرینچی حق ولایتلر و اولسواللیکلر اوچون کوزگه توتیلیشی لازم.
مسعود جنابلریگه کوره بو ایش اصلده ولایت حاکملری و ولایتی کینگشلر ایشی دیر. اونینگ کوپیتیریشیچه، اوتکن 13 ییلده حکومت تامانیدن کوپینچه مرکزده دقت قیلینیشی باعث ولایتلر، ولوسواللیکلر و قیشلاقلر ایسدن چیقاریلگن.
جمهور رییس نینگ اصلاحات کیلتیریش و یخشی حکومتچیلیک بوییچه مخصوص نماینده سی، اصلاحات کیلتیریش و بودجه بیر سانده تطبیق ایتیلیشی اوچون تاکیدلهگن. عین حالده، مالیه وزیرلیگی سوزچیسی عبدالقادر جیلانی نینگ سلام وطندارگه ایتیشیچه، بودجه ایریم تشکیلاتلر یاردمی بیلن تیارلنه دی.
جیلانی جنابلری نینگ سوزلریگه قره گنده، مالیه وزیرلیگی بودجه نی هر بیر ولایت احتیاجیگه قرهب توزه تهدی. جیلانیگه کوره، بعضی تشکیلاتلر بودجه لرینی احتیاجلریگه قرهب توزه تیب هزینه سینی تخمین ایته دیلر.
جیلانی جنابلری نینگ معلوماتیگه کوره، شونینگدیک بودجه لایحه سی توغریسیده هر بیر ولایت نینگ نماینده لریدن مصلحت آلینیب، اوندن کیین اوشبو لایحه بودجه کمیته سی نینگ اعضالری، اقتصاد وزیرلیگی، تشقی ایشلر وزیرلیگی، مالیه وزیرلیگی و جمهور رییسلیک ایشلری بوییچه اداره نینگ نماینده لریگه بیریلهدی. بوندن آلدین هم ولایتی کینگشلر و مدنی جماعه چیلیک ادارهلری ییل نینگ مالی بودجه سی همده لایحه سیگه مصلحتلری نظرده توتیلیشینی ایسته گن ایدیلر.
