د دغې ماڼۍ پر بیارغونې ۵،۷ میلیونه ډالره لګښت راغلی او د هندوستان حکومت له خوا ورکړل شوی دی.
افغان ولسمشر محمد اشرف غني د ستورې ماڼۍ په پرانیست غونډه کې وویل، چې د هندوستان حکومت او ولس مرستې د افغانستان د بیارغونې له پاره د دواړو هیوادونو ترمنځ د نیکو اړیکو ښکارندويي کوي.
د ولسمشر غني پر وینا، د افغانستان او هند اړیکې د پراخیدو په حال کې دي.
نوموړي زیاته کړه:" نن د هند دولت او ولس د افغانستان په بېلابېلو سیمو کې په کوچنیو او سترو بیارغونې او پراختیايي پروژو د ونډې اخیستلو سره غواړي چې موږ د ستونزو پر وړاندې یوازې ونه اوسو او د یو بل په مرسته د خپلواکۍ لار مو چې له پخوا پیل کړې ده د بریالیتوب تر پولو اوږه په اوږه مزل وکړو."
په همدې حال کې د بهرنیو چارو وزیر صلاح الدین رباني غونډې ته وویل، چې دا ماڼۍ د ۵،۷ میلیونو ډالرو په ارزښت د هند له خوا بیارغول شوې ده.
د رباني پروینا، هندوستان او افغانستان د ښو سیاسي اړیکو ترڅنګ په بېلابېلو برخو کې دوستانه اړیکې لري.
دغه راز، د هند لومړي وزیر نریندرا مودي، چې د سکایپ له لارې د ستورۍ ماڼۍ د پرانست غونډه کتله وویل، چې افغانستان او هند له پخوا ښيې اړیکې لري.
مودي زیاته کړه، چې هندوستان د افغانستان د ښې راتلونکې له پاره رښتینی عزم لري او پر وینا يې دغه هڅې به دوامداره وي.
د هند لومړي وزیر پروینا، یو میلیارد او ۲۵۰ میلیونه هندیان د افغانستان بیارغونې امنیت تامین له پاره د افغان ولس ترڅنګ ولاړ دي.
