د افغانستان کرکټ بورډ په نوښت په کابل کی د هیواد د پنځوو زونونو ځوانو۱۸ کلنو کرکټ لوبډلو ترمنځ پېل شوې سیالۍ د مرکزي (بند امیر) لوبډلې په اتلولۍ سره پای ته ورسېدې.
د افغانستان کرکټ بورډ له خوا سلام وطندار ته په رالېږل شوې خبرپاڼه کې ویل شوي، چې د دې سیالیو فاینل لوبه نن یکشنبه ( ۲۰۱۵ م زيږديز/ اپرېل ۵) د مس عینک او بند امیر زونونو منتخبو لوبډلو ترمنځ په کابل کرکټ نړېوال لوبغالي کې ترسره شوه.
خبرپاڼه لیکي، چې مس عینک د پچې ګټلو وروسته یې کوربه بند امیر ته د لومړۍ لوبې کولو بلنه ورکړه او دغه لوبډله په ۵۰ اورونو کې ۲۱۸ منډو هدف و ټاکه.
خبرپاڼه دا هم وايي، د دې هدف په ځواب کې هم د مس عینک لوبډله د بند امیر د بالرانو د ځواب نه وه، چې ټوله لوبډله په ۳۳ م اور کې یعنی ۱۷ اوره وړاندې په ۱۸۴ منډو وسوځېدل.
په دې بريا سره بند امیر مرکزي زون د افغانستان په کچه د ۱۸ کلنو ځوانو کرکټ لوبغاړو ترمنځ د اتلولۍ جام د ۳۴ منډو بریا سره ترلاسه کړ او دغه جام یې پرې نه ښود، چې له کوربه مرکزي زون څخه ووځي.
د یادونې ده، چې د زونونو ترمنځ په دې سیالیو کې د افغانستان د پنځو بوست، سپین غر، امو، مس عینک او بند امیر زونونو هغه لوبغاړو برخه اخیستې وه، چې په تېره میاشت کې د افغانستان کرکټ بورډ د ټاکوونکو او روزونکو ډلګیو له خوا د هېواد په بېلا بېلو زونونو کې د ازموینو وروسته غوره شوي وو.
