د بلخ ولايت د يو شمېر ولسواليو اوسېدونکي وايي، په دې ولايت کې د ۸ زره کورنيو د برښنا د لګښت پيسې د طالبانو له لوري ټولېږي. د ياد ولايت يو شمېر اوسېدونکي سلاموطندار ته وايي، له دوه کلونو راهيسې دوی نه پوهېږي چې د دوی د برښنا د لګښت پيسې چېرته ځي.
د بلخ يو اوسېدونکی وايي، هم دولت او هم طالبان ورنه د برښنا لګښت د پيسو د ورکړې غوښتنه کوي.
بلخ کې د برښنا شرکت مسوولان د ياد ولايت د اوسېدونکيو ادعا تاييدوي او وايي، له ۱۰مياشتو راهيسې يې د درې ولسواليو کې د برښنا د لګښت پيسې نه دي راټولې کړي چې شاوخوا ۱۰ زره کورنۍ کېږي.
ياد ولايت کې د برښنا شرکت رييس حمیدالله حمید سلاموطندار ته وايي، د طالبانو له لوري چې څومره پيسې ټولېږي کره معلومات نه لري؛ خو مني چې طالبان له يو شمېر کورنيو د برښنا د لګښت پيسې ټولوي.
د نوموړي په وينا، دوی نه دي توانېدلي چې په دومره وخت کې د بلخ او چمتال ولسواليو او افغانيه او ترکمنيه سيمو کې مېټرې وګوري.
د بلخ د والي وياند منیر فرهادي وايي، تر اوسه پورې د برښنا شرکت ورته په دې اړه رسمي شکايت نه دی کړی.
وسلهوالو طالبانو هم تر اوسه پورې په دې اړه چې د برښنا د لګښت پيسې ټولوي څه نه دي ويلي.
له دې سره د بلخ د ولايتي شورا رييس افضل حدید د حکومت مرکزي اداره او د برښنا شرکت مسوولان په دوهګوني چلند تورنوي او وايي چې په دې ولايت کې د برښنا بيه لوړه ده او دا لويه ستونزه ده.
بلخ کې د وارداتي برښنا د هر کيلو واټ بيه ۶.۲۵ افغانۍ ده په داسې حال کې چې کابل او هرات کې د برښنا د یوه کيلو واټ بيه ۲.۲۵ نه تر ۴ افغانيو پورې ده.
