بلخ ولایتی قارهلاوچیلیک رسمیلرینینگ ایتیشیچه، اوشبو ولایتده اوتگن ییلگه قرهگنده عیاللرگه قرشی زورهوانلیک و طلاق میزانی آشگن.
مذکور ولایتده طلاق میزانی آشگنیدن خواطر بیلدیرگن بلخ عیاللری برابریدهگی زورهوانلیکنی منع ایتیش قارهلاوچی فوزیه حمیدینینگ سلاموطندارگه ایتیشیچه، جاری ییل باشلنگنیدن بویان عیاللرگه قرشی 125 زورهوانلیک رویخطگه آلینگن و 70 قضیهده طلاق بیریلگن.
خانم حمیدیگه کوره، اوتگن ییل عیاللرگه قرشی 72 زورهوانلیک رویخطگه آلینگن ایکن، بیراق جاری ییلده بو رقم ایکی برابرگه ییتیشگن.
بلخ ولایتی عیاللر ریاستی باشلیغی شهلا حدیدنینگ سلاموطندارگه ایتیشیچه، جاری ییلده اولر، عیاللرگه قرشی 345 عایلهوی زورهوانلیکنی رویخطگه آلگنلر و بو رقم اوتگن ییلگه قرهگنده کوپ بولگن.
بلخ قارهلاوچیلیگیده طلاق قضیهلرینی حل ایتیش اوچون کیلگن قطار عیاللرنینگ ایتیشیچه، تورموش اورتاقلرینینگ ناتوغری حرکتی و عایلهوی زورهوانلیکلر سبب، اولر تورموش اورتاقلریدن اجرهلیشگه قرار قیلگنلر.
بلخ ده افغان عیاللر ترماغی رسمیلرینینگ ایتیشیچه، جزانی کیچیریش مدنیتی سبب، مملکت اینیقسه بلخ ولایتیده عیاللرگه زورهوانلیک میزانی آشگن و دولتدن عیاللرگه قرشی زورهوانلیکلر عامللرینی قولگه آلیب جزالنتیریشینی سورهگنلر.
