افغانستاننینگ ساغلیقنی سقلش وزیرلیگی، حسابات و معلومات مرکزی ادارهسی و آلمانیلیک کیت بیلیم یورتی تامانیدن عملگه آشیریلگن ساغلیک بوییچه ملی تیکشیروونی کورستیشیچه، میلادی 2003- ییلدن میلادی 2018- ییلگچه 5 یاشردن قویی بالهلرنینگ اولیمی 80% کمهیگن.
کابلده خبری بیر ییغینده نطق سوزلهگن ساغلیقنی سقلش وزیری فیروزالدین فیروزنینگ ایتیشیچه، میلادی 2003- ییلده 5 یاشردن قویی بالهلرنینگ اولیمی هر بیر مینگ کیشیده 257 قضیه ایکن؛ بیراق حاضر 49 قضیه گه کمهیگن.
اونینگ کوپهیتیریشیچه، میلادی 2003- ییلدن میلادی 2015- ییلگچه بالهلر اوچون تورلی واکسین تطبیقاتی 15-20% گه آشگن.
ساغلیقنی سقلش وزیری گه کوره، توییب آوقتلنمسلیک کسللیگی هم میلادی 2013- ییلدن 2018- ییلگچه 40.9% دن 36.6% گه کمهیگن.
اوشبو تیکشیروونی کورستیشیچه، همشیرهلر تامانیدن باله دنیاگه کیلتیریشدن آلدین بولگن مراقبتلر یخشی نتیجه بیرگن.
شو توغریده…
شفافیت ادارهسی: ساغلیقنی سقلش وزیرلیگی ساغلیک خذمتی خصوصیده ناکام دیر
قندهارنینگ دند تومنی اهالیسی، ساغلیک مرکزلر کملیگیدن شکایت قیلهدیلر
اوتگن ییلده افغانستان ساغلیک وضعیتی
ساغلیک بوییچه اوتکزیلگن ملی تیکشیروو اساسیده، میلادی 2015- ییلدن 2018- ییلگچه باله دنیاگه کیلتیریشدن آلدین بولگن مراقبتلر 63.8% و همشیرهلر آرقهلی باله دنیاگه کیلتیریش 53% دن 58.8% گه آشگن.
اوشبو ملی تیکشیرووگه کوره، میلادی 2003- ییلگه قرهگنده قیشلاقلرده بولگن عیاللر همشیرهلر آرقهلی توغدیریلیشی 4% دن 51% گه و باله دنیاگه کیلتیریشدن آلدین بولگن مراقبتلر 8% دن 59% گه ییتیشگن.
میلادی 2018- ییل ساغلیک بوییچه اوتکزیلگن ملی تیکشیروو، 20 مینگ عایله بیلن یقیندن صحبت اوتکزیلب آلتی آی جریانیده تیارلنگن. بو تیکشیرووده 23 مینگدن آرتیق باله و 21 مینگدن آرتیق آنه اشتراک قیلگن.
