طالبانو له تېرو څو ورځو راهیسې د بغلان ولایت پر بېلابېلو سیمو خپلو بریدونو ته زور ورکړی دی. دې ډلې پرون ماښام د مرکزي بغلان ولسوالي ډېره برخه نیولې او په پلخمري ښار کې یې یوشمېر سرتېري وژلي دي.
د بغلان د ولایتي شورا رییس محمدصفدر محسني وايي چې د مرکزي بغلان ولسوالي د حسن تال سټراټېژیکه سیمه په یوې سیاسي معامله کې طالبانو ته سپارل شوې ده او یادې ډلې په پلخمري ښار کې د یوې پوستې په نیولو سره ۹ سیمهييز پولیس وژلي او ۵ نور سرتېري یې ټپیان کړي دي.
په همدې حال کې د حسن تال اوسېدونکي محمدخان سلاموطندار ته وویل چې په یاده سیمه کې د نښتو له پیل سره سم لسګونو کورنیو خپل کورونه پرېښي او طالبانو هم څو کورونه سوځولي دي.
خو د بغلان د امنیې قومانداني ویاند احمدجاوید بشارت وايي چې په یاده پېښه کې ۳ سرتېري او ۶ طالبان وژل شوي او ۲ سرتېري او ۲ طالبان ټپیان دي.
د نوموړي په وینا، امنیتي ځواکونه په حسن تال ولسوالي کې هېڅ پوسته نهلري او طالبانو پر یوې غونډې د امنیتي ځواکونو له ځای پرځای کېدو سره سم، پر یاده سیمه برید کړی دی.
د مرکزي بغلان د ولسوالي اړوند د حسن تال سیمه چې پنځه کلي لري، د یادې ولسوالي یوه ستره او سټراټېژیکه سیمه ده. دا ولسوالي د بغلان له برکه او نهرین ولسوالیو او د کندوز ولایت له علياباد ولسوالي سره ګډه پوله لري.
