د بغلان ولایت د قالینو اوبدلو صنعت په تېر وخت کې د افغانستان په صادراتي سوداګریزو کالیو کې ځانکړی ځای درلود، په دې وروستیو کلونو کې دغه صنعت زیانمن شوی او بازار یې خراب شوی دی.
د دغه ولایت ځېنې قالین اوبدونکي وايي، چې حکومت د دغه صنعت پراختیا له پاره پاملرنه نه ده کړې او وايي، چې د مناسب بازار نشتوالي د قالینو صنعت د رکود لامل شوی دی.
دوی وايي، چې د افغانستان قالینې د نورو هېوادونو په نومونو په نړیوالو بازارونو کې پلورل کيږي او دغې چارې د افغاني قالینو باور سخت زیانمن کړی دی.
په ورته وخت کې د قالینو سوداګر هم وايي، چې د افغانستان د قالینو صنعت هغه وخت د ردکو له ګواښه ژغورلی شو، چې حکومت د دغه صنعت ملاتړ وکړي او په نړیوال بازار کې ورته بازار موندنه وکړي.
د دوی په خبره، په بغلان کې د قالینو اوبدلو صنعت په کم رنګه کېدو سره شاوخوا ۱۰ زره مېرمنې او نارینه بې روزګاره شوي دي.
په هېواد کې د ۴۰ کلونو جنګ په اوږدو کې پاکستان په زرکونه افغان قالین اوبدونکي را ټول او له دې لارې یې د پاکستان قالینو اوبدلو صنعت یې نړیوال شهرت ته ورساوه.
د افغانستان صنعت کاران وايي، چې اوس هم د افغانستان تولید شوې قالینې پاکستان ته ځي او هلته له منځلو وروسته نړیوالو بازارونو ته د پاکستان په نوم صادریږي.
دغه سوداګر وايي، له بهرنیو هېوادونو څخه افغانستان ته د ماشیني قالینو واردولو د قالینو صنعت زیانمن کړی او دغه قالینې له ترکیې، ایران او پاکستان څخه وارېدیږي.
په افغانستان کې د ټولو امنیتي او اقتصادي ستونزو سره سره ترکمنۍ، بلوچۍ او چوبرنګ افغانۍ قالینې په نړیوالو بازارونو کې ښه شهرت لري.
زیات شمېر هېواد وال په دې باور دي، چې د افغاني قالینو بیو ډېروالی د دې لامل شوی، چې خلک په لاس جوړو شویو بومي قالینو په ځای ماشیني قالینې واخلي.
