بغلان حوزهوی دریاسینینگ رییسی انجنیر محمد نعیم "نوابی" بوگون خبری بیر اولتیریشده ولایتنینگ کیلهگی برق توغانینی قوریش دستلبکی ایشلری تکمیل ایتیلیب، مذکور توغاننینگ عملی ایش تیزلیکده باشلهنی بارهسیده خبر بیرگن. نوابی داووخان زمانیده نقشهسی چیزیلگن بغلان کیلهگی برق توغانینینگ ایشی سوو برق وزیرلیگی، امریکه قوشمه ایالتلری و دنیا بانکی تامانیدن قوریلهدی دیگن. جناب نوابینینگ سوزلریگه قره گنده آسیاده نظری بولمهگن اوشبو توغان قوریلیشی اوچون بیر میلیارد امریکه دالری صرفلهنیشی انابتگه آلینگن.
اوشبو برق توغانی بغلان ولایت اهالیسینی برق کوچی بیلن تامینلشدن علاوه قوشنی ولایتلرگه هم برق بیریشی ایتیلهدی. شونینگدیک مذکور توغانده توپلنه دیگن سوو 450 مینگ جریب ایکن ییرنی سوغاریشی تخمین ایتیلگنی معلوم قیلیندی.
بغلان دریا حوزهسینینگ رییسی دنیا جماعهچیلیگی و افغانستان حکومتینی مالی حمایت قیله دیگن دولتلردن کیلهگی برق توغانی قوریلیشی اوچون ییترلی بودجه تامین قیلیشلرینی سورهگن.
عین حالده، بغلان بیلیم یورتی استادی همده اقتصادی تحلیلچی محمد شفیق "شفق" بغلانده مذکور توغان قوریلیشی سیاسی و اقتصادی جهتدن هم ییریک اهمیتی بار دیگن. اونگه کوره، مذکور توغان ایشی باشلگن حالده، بغلان ولایت امنیتی تامین ایتیلیشیدن تشقری بو ولایت صنعتی و صادراتی شهرگه ایلهنیشی امکاندن اوزاق ایمس.
حاضرگی کونده ولایتیده ایکّی برق توغانی موجود، بو توغانلر 12 میگاوات برق ایشلب چیقاریش کوچیگه ایگه. ایتیلیشیچه، مذکور توغانلر غوری سمنت، نساجی، شکری، پایه قوریش و باشقه شرکتلر ماشینلرینی یورتیش کوچیگه ایگه ایمس. افغانستان سوو برق وزیرلیگی تورت ییل آلدین مذکور توغان قوریلیشی حقیده خبر بیرگن ایدی.
