بغلان ولایتیده مرکزی بغلان ولسواللیگی مکتبلری مدیرلرینینگ ایتیشلریچه، بو ولسواللیک معارف ادارهسی آمری بوندن بیر آی آلدین ایشدن آلینگن؛ اما زوردن قورال واسطهسیده باشقه کیشینی بو مدیرتگه کیلیشگه قویمیدی.
مرکزی بغلان ولسواللیگی ایشدن آلینگن معارف ادارهسینینگ آمری عبدالجلیلنینگ ایتیشیچه، اهالی ایستهگی اساسیده اوشبو ادارهنینگ رییسی صفتیده تعین ایتیلگن. قورالدن فایدهلنگنلیگینی رد قیلگن عبدالجلیل اهالی ایستهگی اساسیده ایشیگه دوام بیرهدی و هیج کیم ایسه ایشدن آلالمیدی دیگن.
بوگون بغلان معارف ادارهسی قرشیسیده توپلنگن مرکزی بغلان ولسواللیگی مکتبلرینینگ اونلب مدیری، ولسوالیکدهگی تعلیم و تربیه ساحهسیدهگی معما برطرف ایتیلمهگن حالده، مکتبلر ایشیگی اوقوچیلر یوزیگه یاپیلیشی بارهسیده آگاهلنتیرگنلر.
شونینگدیک مذکور اعتراضچیلر مرکزی بغلان ولسواللیگی معارف مدیرینی زوروانلیک همده اوقیتوچیلر پولینی حیف و میل ایتیشگه عیبلب، ایشدن آلینیشینی سورهگنلر.
اعتراضچیلرنینگ سلاموطندارگه معلوم قیلیشلریچه، عبدالجلیلنینگ امضاسی دولت ادارهلرگه اعتبارسیزدیر انه شو باعث ایکی آیدن بیری اوقیتوچیلرنینگ آیلیگی تولنمهگن.
اعتراضچیلردن محمد کریمگه کوره، مذکور ولسواللیک معارف ادارهسی عبدالجلیل تامانیدن «غصب» ایتیلگن و حاضر ایسه بو اداره «فلج» دیر.
ولایت معارف ادارهسی سرپرستی عبدالقادر رسولینینگ اعتراضچیلر سوزلرینی تصدیقلب ایتیشیچه، بوندن بیر آی آلدین حاجی انار گل مذکور ولسوالیک معارف مدیر ایتیب تعینلنگن، اما بعضی قیینچلیکلر باعث هنوز ایشگه باشلمهگن
برچه عیبلاولرنی رد قیلگن مرکزی بغلان معارف مدیری عبدالجلیل، اعتراضچیلرنینگ کوپچیلیگی اوزی اداری فسادگه قولی بارد دیگن.
عبدالجلیل بوندن نیچه کون آلدین عاموی اخبارات واسطهلری اختیاریگه بیرگن حجتده اوشبو ولسواللیک معارف مدیریتیده یوزلب خیالی معلم موجودلیگی و اولرنینگ آیلیگی حیف میل ایتیلیشی معلوم قیلینگن ایدی. ایتیلیشیچه، مذکور آیلیکلر اوشبو ادارهنینگ سابق مسووللری آرقهلی حیف و میل ایتیلگن.
