چمه‌سی تورت ییلدن بیری بغلان ولایتی نینگ مرکزی، بغلان تومنیده‌گی ییریک سب‌استیشنلردن بیری تومن اهالیسی‌گه برق ترقتیش اوچون تیار؛ اما شرطنامه گه قول قویگن شرکت اوشبو سباستیشن قوریلیشی اوچون پول توله‌مه‌گن لیگی باعث برق ترقه‌تیش جریانی توخته‌تیب قوییلگن. مرکزی بغلان نینگ یشاووچیلری 47درجه ایسیق‌لیککه چیده‌ب، برق سیز حالت‌ده حیات‌گه دوام بیرماقده‌لر.
سوو برق وزیرلیگیده مدیریت ضعیف‌لیگینی تنقید آستیگه آلگن مرکزی بغلان یشاووچیلری همده ولایت کینگشی نینگ اعضالری، بو قیینچلیک حلی اوچون اعتبار بیریلمه‌گن حالده، کابل‌گه برق آلیب اوتیش اوچون ایکین ییرلریده تیکلنگن برق پایه‌لرینی بوزیب تشلشلری باره‌سیده آگاهلنتیرگنلر.
قوم بویوکلریدن بیری ارباب فرامرز، مرکزی بغلان نینگ چمعقله تومنیده برق سب‌استیشنی قوریلگن لیگی‌گه تورت ییل تولیشی‌گه قره‌مه‌ی، شرطنامه‌گه قول قویگن شرکت نینگ پولی سوو برق وزیرلیگی تامانیدن تولنمه‌گن لیگی باعث برق ترقه‌تیش جریانی توخته‌تیب قوییلگن لیگینی ایته‌دی.
قوم بویوکلریدن ینه بیری حاجی دل آقا، بوندن کیین ظلم‌نی چیده آلمه‌ی‌میز دیدی. کابل‌گه برق آلیب اوتیش نیتده ایکین ییرلریده قوریلگن برق پایه‌لرینی بوزیب تشله‌ی‌میز دیدی حاجی دل‌آقا.
مرکزی بغلان نینگ حاکمی گوهرخان بابری، مذکور تومن خلقی‌دن تشقری حربی پوسته‌لر همده تومنده‌گی حربی مرکزلرده هم برق یوق دیگن.
بابری، بغلان‌ده‌گی برق اهالی اوچون ییترلی ایمس دیدی. شونینگ اوچون اهالی بو ساحه‌ده کتّه قیینچلیک بیلن روپه ره ایکنلرینی تصدیق ایتگن او.
بغلان ولایتی نینگ ولایت کینگشی باشلیغی اسدالله شهباز، افغانستان سوو برق وزیرلیگی تورت ییلدن بیری تورلی بهانه‌لر بیلن مرکزی بغلان‌ده‌گی ییریک سب‌استیشن‌نی فعال قیلمه‌گن لیگینی معلوم قیلدی.
سوو برق وزیرلیگی نینگ معاونی امان‌الله غالب، اوشبو سباستیشن فایده‌لنمس لیگی اوچون تورلی دلیللر باعث بولگن لیگینی اظهار قیلگن.
اونینگ سوزلریگه‌کوره، شرطنامه امضاله‌گن شرکت جریمه تولش‌گه مجبور بولگن. وزیرلیک تیز آره‌ده بو سباستیشن برقینی ترقه‌تیش اوچون چاره تد‌بیر کوره‌دی دیگن وزیرلیک نینگ بو رسمیسی.
بغلان‌ده برق ایشلب چیقاروچی ایکّی ته سوو توغانی بولیشی‌گه قره‌مه‌ی، اهالی چیت ایل‌دن آلیب کیلیگن برق‌دن هم فایده‌لنه‌دیو لیکن، هنوز هم ولایت خلقی نینگ کته قسمی برق یاروغ لیگیدن محروملر.
