بوگون «چهارشنبه» انگلستان باشکینتی لندن، کابل و آسلامآباد آرهسیدهگی سیاسی جنجللرنی حل ایتیش اوچون افغانستان، پاکستان و انگلستاننینگ اوچ تامانلمه ییغینیگه میزبانلیک قیلگن. اوشبو ییغینده افغانستان نمایندهلیگیدن خوفسیزلیک کینگشی مصلحتچیسی حنیف اتمر اشتراک ایتگن.
بیراق، حربی ایش بیلرمانلردن بیرقطارینینگ ایتیشیچه، بو ییغین پاکستان دولتینینگ ایستهگی بیلن یولگه قوییلگن و انگلستان بو مملکتنی سیاسی جنجلدن قوتقریش اوچون حرکت قیلهدی.
سلاموطندار بیلن صحبت اوتکزگن حربی ایش بیلرمان کابلخان تدبیرنینگ ایتیشیچه، منطقهده انگلیس و امیریکه منفعتی آرهسیده جنجل موجود و شو یوزدن انگلستان اوز منفعتینی سقلش خصوصیده، پاکستانگه یاردم بیرهدی. جناب تدبیرگه کوره، پاکستان حربیلری، اوچ تامانلمه ییغینده ارایه ایتیلگن ییچیم یولگه صادق قالمهیدی. او، اوچ تامانلمه ییغین نتیجهسینی منفعتلی ایمس دیب ایتیشیچه، پاکستان، افغانستانده اوز منفعتینی ایزلهیدی.
حربی ایش بیلرمانلردن باشقه بیری عتیقالله امرخیلنینگ ایشانچیگه کوره، انگلستان، پاکستاننی سیاسی جنجلدن قوتقرماقچی بولگنده، اوچ تامانلمه ییغین افغانستانگه هیچ قندهی ایجابی نتیجه بیرمهیدی.
بیراق، سلاموطندار بیلن صحبت اوتکزگن ملی خوفسیزلیک کینگشی سوزلاوچیسی تواب غورزنگ، اوچ تامانلمه ییغینده انگلستان رولینی ایجابی بیلیب ایتیشیچه، بو ییغینده افغانستان و پاکستان آرهسیدهگی سونگی جنجللر حل ایتیلیشی اوستیگه بحث اوتکزیلگن. اونینگ ایتیشیچه، بریتانیا، افغانستاننینگ یقین بیرلشیکلریدن دیر.
افغانستان، پاکستان و انگلستان آرهسیدهگی اوچ تامانلمه ییغین، سونگی کونلرده کابل و اسلامآباد آرهسیدهگی قرهمه قرشیلیکلر شدتلنگن بیرچاغده یولگه قوییلگن.
