نمایندهلر مجلسی نینگ ایکینچی اورین باسری محمدنذیراحمدزی سلاموطندار رادیوسیگه بیرگن مصاحبهده، قوراللی طالبلر رسمی مسکو آرقهلی جهازلنگن لیگی توغریسیدهگی میش – میشلر آرتگندن سونگ، افغانستان حکومتی جنگری طالبلر رسمی مسکو آرقهلی جهازلهنیب حمایت بولگن لیگینی اثباتلاووچی حجت تقدیم قیلگن دیگن.
جناب احمدزیگه کوره، افغانستان حکومتی سابقدن بو توغریده بعضی بیر حجتلرنی قولگه کیریتگن. روسیه دولتی جنگری طالبلر ایمس بلکه حکومت نینگ قرشیسیده فعالیت قیلهدیگن باشقه گروهلرنی حمایت قیلیب کیلگن دیگن جناب احمدزی. عین حالده، جناب احمدزی، رسمی مسکو جنگری طالبلرن حربی نقطه نظردن حمایت قیلگنلیکدن علاوه بولرگه جلب و جذب بولیمیده هم کومک قیلگن دیگن.
بوندن آلدین ارزگان ولایتی نینگ امنیه قوماندانی غلام فاروق سنگری، روسیهلیکلر ولایت نینگ گیزاب تومنیدهگی طالبلرگه حربی قورال اسلحه ییتکزیب بیرگنلر دیگن ایدی. بو تومنده گی اوروش روسیهلیکلر تامانیدن رهبرلیک قیلینهدی دیگن ایدی جناب سنگری.
بو گزارشلرگه عکسالعمل بیلدیرگن روسیه نینگ کابلدهگی ایلچیلیگی، بو ادعالرنی اثباتلاووچی حجت بولگن حالده، ایلچیلیککه تقدیم ایتیلیشی کیرهک دیگن.
قوراللی طلبلر رسمی مسکو آرقهلی حمایت بولگنلیگی توغریسیده افغانستان تشقی ایشلر وزیرلیگی فکرینی اورگهنیش اوچون حرکت قیلدیک. اما اولر مساله مدافعه وزیرلیگیگه تیگیشلی دیدیلر.
مملکت ملی مدافعه وزیرلیگی نینگ سوزلاووچیسی دولت وزیری، قوراللی طالبلرنی دستکلش هیچ بیر مملکت نینگ فایدهسیگه ایمس دیگن. منطقه دولتلری ترورچیلر فعالیتی آلدی آلینیشی مقصدیده افغانستان حکومتیگه کومک قیلیشلری مقصدگه موافق دیگن جناب وزیری.
