بوگون «یکشنبه» کابلده خبری بیر ییغین اوتکزگن سیلاولر ایرکین کمیسیونی مسؤوللری‌نینگ معلوم قیلیشیچه، برچه بایومتریک اسکونه‌لری زمانه‌وی جهازلر بیلن مذکور کمیسیون گه تاپشیریلگن و بو اسکونه‌لرنی انتقال بیریش جریانی آلتی ولایت جمله‌دن نورستان، بدخشان، پکتیکا، ارزگان، غور و فاریاب گه باشلنگن و مملکت بویلب بو اسکونه‌لرنی انتقال بیریش جریانی کیله‌جک هفته گچه یکونلنیشی ممکن.
سیلاولر ایرکین کمیسیونینینگ سوزلاوچیسی حفیظالله هاشمینینگ ایتیشیچه، 22 منیگ بایومتریک اسکونهسی زمانه‌وی جهازلر بیلن اوشبو کمیسیون اختیاریگه قرار تاپگن، انهشو سبب نمایندهلر کینگشی سیلاویده بایومتریک سیستمهسیدن قولهنیش حتمی دیر.
جناب هاشمی گه کوره، اوشبو اسکونهلردن قولهنیشی خصوصیده 2 مینگ کیشی تعلیمات کورگن و اوشبو کیشیلر زنجیرهیی شکلده 21 مینگ آواز بیریش مرکزگه تعلیمات بیرهدی.
اوتکن کونی سیاسی حزبلر، کابلده بیر خبری ییغین آرقهلی، بایومتریک اسکونهسی تامانیدن آواز بیرووچیلرنینگ صورتی آلینیشنی حتمی دیب و صورت آلیشنی ایستمهگن آواز بیرووچیلرنینگ بوتون پارماغلرینی بایومتریک ایتیلیشی اوستیگه تاکید قیلگن ایدیلر.
بیراق جناب هاشمینینگ ایتیشیچه، کمیسیون قراریگه کوره، صورت آلیش ایرککلرگه حتمی و عیاللرگه اختیاری دیر. اونینگ ایتیشیچه، بو لایحهگه آواز بیرووچیلرنینگ یالغیز شهادت پارماغی بایومتریک ایتیلهدی.
سیلاولر ایرکین کمیسیونی سوزلاوچیسیگه کوره، یالغیز کیملیکلری استیکر ایتیلگن کیشیلر نمایندهلر کینگشی سیلاویده اشتراک قیله آلهدی.
جناب هاشمینینگ ایتیشیچه، سیلاونینگ حساس مادهلری سیلاو مرکزلریگه انتقال بیریلگن.
عینحالده، فیفانینگ اجراییه باشلیغی یوسف رشیدنینگ ایتیشیچه، سیلاولر ایرکین کمیسیونینینگ طبیعی واقعهلر و امنیتی موضوعلر خصوصیده استثنایی بیر لایحه اوستیگه ایش قیلیشی کیرهک و حکومتنینگ بو توغریده سیلاولر ایرکین کمیسیونیگه همکارلیک قیلیشی لازم.
