مملکت دولت باشقرهلاوچیلیگی کابل بانک قرضدارلریدن 201 میلیون دالر قولگه کیریتیلگنی بارهسیده خبر بیرگن. دولت باشقرهلاوچیلیگی سوزلاوچیسی بصیرعزیزنینگ بوگون (شنبه) کابلده بیر خبری ییغینده ایتیشیچه، مذکور بانک قرضدارلریگه تیگیشلی مُلکنی دولت اختیاریگه اوتیشی بیلن ینه 47 میلیون دالر قولگه کیریتیلگن.
کابل بانک افغانستان سابق جمهور رییسی حامد کرزی زمانیده مذکور بانکنینگ پولی خارجگه چیقاریلیشی بیلن کابل بانک شکستگه روپه ره بولیب، 900دن آرتیق دالر زیان کوردی. محمد اشرفغنی افغانستان جمهور رییسی صفتیده ایشگه باشلهگن دن کیین بیرینچی مرته کابل بانک دوسیهسی قیتهدن تیکشیریلیشینی بویوردی.
اوشبو بانکنینگ دوسیهسی قیتهدن تیکشیریلیشی بیلن مذکور بانکنینگ اصلی شریکلریدن شیرخان فرنود و خلیلالله فیروزیلر قوشیمچه بو بانک نینگ قطار ملازملری قرضلرینی تولشگه محکوم ایتیلدی.
دولت باشقرهلاوچیلیک سوزلاوچیسیگه کوره، کابلبانک قرضدارلری بیلن امضالنگن شرطنامهگه موافق 159 میلیون دالر قسط اساسیده مذکور بانک قضیهسینی تیکشیروچی کمیتهگه تولهشی کوتیلهدی.
جناب عزیز، تشقی مملکتلرگه قاچگن مذکور بانکنینگ ایریم قرضدارلری خلق ارا پولیس و تشقی ایشلر وزیرلیگی همکارلیگی بیلن مملکتگه آلیب کیلینه دیلر دیگن.
بوندن ایکی هفته آلدین جمهور رییسنینگ حقوقی مصلحتچیسی عبدالعلی محمدی «هوشمند شهرچه»سی آچیلیش مراسمیده چیقیش قیلیب، کابل بانک پوللرینی ییغیش کمیسیون، جمهور رییسلیک سرایی، کابینه و کابل بانک دوسیهسینی تیکشیروچی مخصوص محکمه کابلبانک قرضدارلرینی تورمهدن آزاد قیلیب اوشبو پولنی قولگه کیرتیش اوچون قرار آلگن دیگن ایدی. مذکور ییغینده کابل بانکنینگ اصلی قرضدارلریدن بیر خلیلالله فیروزی سرمایه یاتقیزیش بیلن تورمهدن آزاد ایتیلگن ایدی. اما، جمهور رییس ایکی کوندن سونگ مذکور شرطنامهنی بیکار قیلدی.
جناب فیروزی بیلن هوشمند شهرچه قوریش اوچون شرطنامهگه قول قویگن مساله توغریسیده بوگون جمهور رییس سوزلاوچیسینینگ اورین باسری سیدظفرهاشمیگه کوره، مذکور کیلیشو خلیلالله فیروزی بیلن امضالهنیش اوچون کیم شرایط یرهتگنی بارهسیده جمهور رییس اوزی تیکشیرو اوتکزیشنی معلوم قیلگن. سوزلاوچی مذکور تیکشیرونینگ نتیجهسیده نهایی بولگندن سونگ اعلان ایتیلیشی ممکن دیگن.
