د افغانستان د ازادې مبارزې (فري فایټ) مشهوره لوبغاړی باز محمد مبارز نن پنجشنبه (اپرېل ۷) له کابل څخه د تایلینډ پلازمینې بنکاک ته روان شو.
د افغانستان بدني روزنې ریاست له خوا د ورکړل شویو معلوماتو له مخې، نوموړی به په تایلینډ کې د روسی سیال "مکسین کتکوف" خلاف سیالۍ ته ښه تیاری ونیسي.
باز محمد مبارز نن د افغانستان د بدني روزنې ریاست د لوړو پوړو چارواکو له خوا د تایلینډ پلازمېنې بنکاک په لور رخصت شو.
د بدني روزنې خبرپاڼه لیکي، چې باز محمد مبارز به په تایلینډ کې له مشهوره روزونکو سره ۱ میاشت تمرین و کړي.
خبرپاڼه زیاتوي، چې په تایلینډ کې د بازمحمد مبارز د تمریناتو موخه د روسي سیال خلاف په راتلونکې (مې) میاشت کې کیدونکې نړیوالې سیالۍ ته ښه تیاری دی.
ویل کیږي، چې روسي مکتکوف د ازادې مبارزې په لوبه کې د روسیې په "دیو" مشهوره دی چې د "مې" میاشتې په ۲۲ مه نیټه به د افغانستان سیال باز محمد مبارز خلاف په مسکو کې د لوبې ډګر ته ووځي.
د ورکړل شویو معلوماتو له مخې، چې له افغان باز محمد مبارز سره د تایلینډ په تمریناتي سفر کې د هغه روزونکي عبدالواسیع قیومي هم ملتیا کوي.
د بدني روزنې ریاست خبرپاڼه کې راغلي دي، چې د "فري فایټ" لوبې تکړه لوبغاړي باز محمد مبارز د سفر ټول مصارف د افغانستان بدني روزنې ریاست په غاړه لري.
باز محمد مبارز به روان کال د دویم ځل له پاره په نړیواله سیالۍ کې د لوبې ډګر ته ووځي، چې تیره میاشت ېې په روسیه کې امیر ستاروف ته په اسانۍ سره ماتې ورکړه.
د ازادې مبارزې (فری فایټ) لوبغاړي باز محمد مبارز ته تیره اوونۍ د افغانستان د کورنیو چارو وزارت له خوا د پولیسو سفیرلقب هم ورکړل شو.
