افغانستان ایچکی ایشلر وزیرلیگی اوزینینگ بیرینچی آلتی آیلیک حساباتینی نشر قیلدی. مذکور حساباتده ملی پولیس کوچلری جاری ییلنینگ بیرینچی آلتی آییده اوتکزگن عملیاتده 5635 جنگری طالب نابود ایتیلگن 3102 طالب تن جراحتی آلگن. شونینگدیک 631 کیشی ایسه ترورچیلیک فعالیتلرگه عیب لهنیب قولگه آلینگن.
وزیرلیک نینگ سوزلاووچیسی صدیق صدیقی نینگ پنجشنبه کون بیر خبری اولتیریشده ایتیشیچه، جنگری طالبلرگه ییتکزیلگن تلفات اوتگن ییلگه قرهگنده 14% آشگنلیکنی کورستهدی.
صدیقی، جاری ییلنینگ بیرینچی آلتی آییده ملی کوچلرنینگ عملیاتی جنگریلرگه قرشی 70% آشگن دیگن. اونگه کوره، افغان ملی پولیس کوچلری مستقل همده قوشمه شکلده 2637 حربی عملیاتنی مملکتنینگ تورلی حدودلریده اوتکزگنلر.
ایچکی ایشلر وزیرلیگی سوزلاووچیسیگه کوره، جاری ییل ایسه اوتگن ییلگه قرهگنده جنگری طالبلرنینگ هم فعالیتی کوزگه کورینرلی درجهده آشگن و ییل نینگ بیرینچی آلتی آییده قندوز، بدخشان، فاریاب و سرپل ولایتلری جنگریلرنینگ کوپ هجوم قیلگن حدودلری سنهلهدی.
مملکت ایچکی ایشلر وزیرلیگینینگ گزارشیگه کوره، اوشبو آلتی آی جریانیده تینچ اهالینینگ تلفات میزانی 5% کمیگن.
ملی پولیس کوچلری تلفاتی حقیده انیق معلومات بیرمهگن جناب صدیقی: «ملی پولیس همده محلی پولیس کوچلری مملکت نینگ ایریم حدودلریده ترورچیلیککه قرشی کورهشیش اوچون اوروشنینگ چیزیغیده بولگنی سبب اوتگن ییلگه نسبتن تلفات میزانی 5% آشگن» دیگن.
عین حالده، ایچکی ایشلر وزیرلیگینینگ سوزلاووچیسی جنایی حادثهلرهم آلتی آی دوامیده 8% آشگن دیگن. اونگه کوره، ملی پولیس کوچلری 12 مینگ کیشینی 9538 واقعهگه عیبلب حبسگه آلگن.
جاری ییل بهار آییدن بویان قوراللی طالبلرنینگ هجومی دییرلی شددتلشدی، جنگرلرنینگ هجومی کون ساین آشیب بارماقده. سونگی وقتلرده مذکور گروه 14 ییلدن کیین مملکت شمال شرقیده جایلشگن قندوز شهرینی اوز تصرفیگه آلیشگه موفق بولدی.
