بوگون «دوشنبه» کابل‌ده خبری ییغین اوتکزگن مدنی جماعه‌چیلیک قوشمه ایش گروهی‌نینگ اعضالری، حکومت تامانیدن انسان حقلری ایرکین کمیسیونی‌نینگ ینگی کمیشنرلری تانیشتیریلمه‌گنیدن خواطر بیلدیریب ایتیشیچه، جمهور رئیس ینگی فرمان صادر قیلیب انسان حقلری کمیسیونی سیاسی بولیشی‌نی ایسته‌یدی.
اولرگه کوره، انسان حقلری کمیسیونی‌نینگ کمیشنرلری تنله‌نیشی اوچون مشخص اداره‌لر تامانیدن 28 ینگی کیشی تانیشتیریلیشی خصوصیده جمهور رئیس تامانیدن صادر ایتیلگن ینگی فرمان مذکور کمیسیون‌نینگ ایرکین‌لیگی‌نی سوراققه دوچ قیله‌دی.
مدنی جماعه‌چیلیک قوشمه ایش گروهی‌نینگ اعلامیه‌سیده کیلیشیچه، انسان حقلری ایرکین کمیسیونی‌نینگ اعضالری تنله‌نیب و تعیین ایتیلیشی خصوصیده، جمهور رئیس تامانیدن صارد ایتیلگن 2727 رقم‌لی حکم مذکور گروه نینگ جدی شکلده خواطرگه سالگن و بو حکم کمیسیون نی سیاسی قیلیب و ایشانچ‌سیزلیگی گه سبب بوله‌دی.
مدنی جماعه‌چیلیک قوشمه ایش گروهی‌نی اعضاسی نعیم ایوبزاده نینگ ایتیشیچه، حکومت بیرینچی‌دن سیلاولر ایرکین کمیسیونی نینگ سیاسی قیلدی و حاضر انسان حقلری کمیسیونی نینگ سیاسی‌لشتیریش اوچون حرکت قیلماقده.
اونگه کوره، اولرگه ییتیشگن معلومات اساسیده، حکومت تامانیدن ایجاد ایتیلگن ینگی رویخط مدنی جماعه‌چیلیک قوشمه ایش گروهی و تنلش کمیته تامانیدن تانیشتیریلگن رویخط‌گه قرشی دیر.
مدنی جماعه‌چیلیک قوشمه ایش گروهی اعضالری‌نینگ ایتیشیچه، جمهور رئیس غنی‌نینگ بیرینچی فرمانی و طرزالعمل اساسیده، اولر تیکشیروو و سیناودن سونگ، 81 کیشی نی باش محکمه، باش قاره‌لاوچیلیک باشلیغ‌لری، عیاللر وزیری، عدلیه وزیری و اساسی قانوندن نظارت قیلووچی ایرکین کمیسیون باشلیغی‌دن تشکیل ایتیلگن تنلش کمیته گه تانیشتیرگن و بو کمیته ایسه 81 کیشی‌نینگ آره‌سیدن 27 کیشی‌نی جمهور رئیس گه تانیشتیریب و جمهور رئیس دن 9 ته‌سینی انسان حقلری ایرکین کمیسیونی نینگ کمیشنرلری صفتیده تانیشتیریشی‌نی ایسته‌گن؛ بیراق جمهور رئیس ینگی حکم صادر قیلیب، عالم‌لر کینگشی، کابل بیلیم یورتی، انسان حقلری اداره‌لری و حقوقدانلر اداره‌سی تامانیدن باشقه 28 کیشی تانیشتیریلیشی‌نی سوره‌گن و بو موضوع طرزالعمل و پاریس قاعده‌سیگه قرشی بولیب و انسان حقلری کمیسیون کمیشنرلری‌نینگ تنلش جریانی‌نی سیاسی‌لشتیره‌دی.
عین حالده، سلام‌وطندارگه صحبت بیرگن جمهورلیک ریاستی سوزلاوچیسینی اورین باسری شاه حسین مرتضوی، انسان حقلری ایرکین کمیسیونی نینگ سیاسی‌لشتیریش موضوعی‌نی رد قیلیب ایتیشیچه، جمهور رئیس بو حکم نی مذکور کمیسیون نینگ کمیشنرلری دقیق شکلده تنله‌نیشی اوچون صادر قیلگن.
مدنی جماعه‌چیلیک قوشمه ایش گروهی‌نینگ اعلامیه‌سیده آگاه‌لنتیریلیشیچه، حکومت اولرنینگ ایستک‌لریگه قانون و پاریس قاعده‌سی اساسیده دقت قیلمه‌ی و انسان حقلری کمیسیونی نینگ ایرکین‌لیک‌دن محروم قیلیش جریانی گه دوام بیرگن صورتده، اولر بیرلشگن ملت‌لر تشکیلاتی‌نینگ انسان حقلری کینگشی شامل انسان حقلری خلق ارا تشکیلات‌لریگه مراجعه قیلیب و ایستک‌لریگه ایریشگونچه دادخواهلیک قیله‌دیلر.
