هرات ولایتی‌نینگ صنعت و کان‌لر اتاقی و قطار ایش‌خانه‌چی لری‌نینگ ایتیشیچه، امریکانینگ ایران‌گه قرشی تحریم‌لری، اولرنینگ ایش‌لری اوستیگه سلبی تاثیر تشلب و ایران توارلری‌نینگ کم گمرک بیلن وارد ایتیلیشی سبب، اولر تشقی محصولات لر بیلن رقابت قیله‌آلمیدی.
ایش‌خانه‌چی‌لرگه کوره، امریکانینگ ایران‌گه قرشی تحریم‌لری‌نینگ قیته‌دن باشله‌نشی سبب، سوداگرلر و هرات صنعت‌چیلری، سوداگرلیک توارلرینی بندرعباس و چابهاردن وارد قیله‌آلمیدیلر.
هرات ولایتی صنعت و کان‌لر اتاقی‌نینگ باشلیغی حمیدالله خادم‌نینگ سلام وطندارگه ایتیشیچه، امریکا بیرلشمه ایالاتی‌نینگ ایران‌گه قرشی تحریمی و تومان‌نینگ تشقی پوللر برابریده ارزشی کمه‌یگنی سبب هرات ایش‌خانه‌چیلری تشقی محصولات لر بیلن رقابت قیله‌آلمیدی.
جناب خادم گه کوره، تومان‌نینگ بهاسی کمه‌یگنی بیلن، ایران ایش‌خانه‌لری مشابه تولیدات‌لرنی کم بها بیلن هرات‌گه صادر قیله‌دی و اوشبو ایش افغانستان کارخانه‌لری‌نینگ ضعیف له‌نیشی گه سبب بولگن.
اونینگ ایتیشیچه، بندرعباس و چابهار، منطقه‌نینگ اونملی بندرلریدن حساب لنه‌دی. افغانستان سوداگرلری‌نینگ کوپینچه امواللری اوشبو بندرلر آرقهلی افغانستانده وارد ایتیله‌دی ؛ بیراق ایران‌گه قرشی بولگن تحریم‌لر سبب اولر خام ماده و ماشین آلات‌نی دینا شرکت‌لریدن مملکت‌گه کیلتیره آلمیدیلر.
هرات سوداگرلری و ایش‌خانه‌چی‌لریدن بیرقطاری، تحریم‌لرنینگ سلبی تاثیری، تومان‌نینگ بهاسی کمه‌یگنی و اوشبو توغریده حکومت‌نینگ توجه سیزلیکی‌دن خواطر بیلدیریب اوشبو وضعیت اولرنینگ محصولات لریدن بیر بولیمی نی توخته‌تیب قویش‌لریگه سبب بولگن دیدیلر.
اولرنینگ ایتیشیچه، حکومت تشقی مشابه تولیدات‌لرگه گمرکی تعرفه‌لرینی یوقاری ایلتمی و اوشبو لایحه دوام تاپگن حالده هرات گه بولگن ایش‌خانه‌لردن بیرقطاری‌نینگ شکست بیلن دوچ کیلیشی ممکن.
هرات حاکمی‌نینگ سوزلاوچیسی جیلانی فرهادنینگ ایتیشیچه، میوه‌جات و سبزوات‌لرگه فصلی تعرفه‌لرعملی بولگن و مرکزی حکومت هدایتی اساسیگه ایچکی محصولات لردن حمایت ایتیش اوچون بیرقطار برنامه‌لر قولگه آلینگن.
هرات ولایتیده اقتصادی ایش بیلرمانلرنینگ ایتیشیچه،حکومت‌نینگ ایچکی محصولات لرنی رشد بیریش اوچون اوزن مدتلی برنامه‌سی بولمگنی سبب افغانستان مصرفی مملکت گه اوزگریلگن.
