.PNG)
خلق ارا کیچیریم تشکیلاتی تامانیدن ینگیلیکده ترقهتیلگن گزارشده معلوم قیلینیشیچه، اوروش و ناتینچلیک باعث، افغانستان یشاوچیلریدن 1.2 میلیون کیشی منطقهلریدن بدرغه بولگن. اوشبو گزارش اساسیده، ایچکی بدرغهلر رقمی میلادی 2013- ییلده 500 مینگ کیشی ایکن و ینگی ترقهتیلگن گزارشده ایکی برابر کوپهیگنینی کورستهدی.
خلق ارا کیچیریم تشکیلاتینینگ تیکشیرووچلری، ایچکی بدرغهلر وضعیتینی کابل، هرات و بلخ ولایتلریده تیرگاوگه آلیب و مذکور ولایتلرده یوز عایله بیلن اوچرهشیب صحبت اوتکزگن. اوشبو تشکیلات تیکشیرووچیلرینینگ معلوماتی اساسیده، ایچکی بدرغهلر وضعیتی اوتگن ییلگه قرهگنده یمان بولگن.
بوگون (سهشنبه) کابلده اوتکزیلگن خبری بیر ییغینده، خلق ارا کیچیریم تشکیلاتی آسیا بولیمی باشلیغی چامپا پاتیل، افغانستان خصوصیده دنیانینگ بی فرق یاندهشیدن خواطر بیلدیریب ایتیشیچه، بدرغه بولگنلرنینگ حیاتی توغریسیده بی فرق یاندهشیلگنی باعث، اولرنینگ وضعیتی یامان بولگن. مذکور تشکیلات آسیا بولیمی باشلیغیگه کوره، حکومتنینگ بیرگن وعدهلریگه قرهگنده، بدرغهلر حاضرگچه باش پناه، ییگولیک آذیق- آوقت، سوو و تعلیمات فرصتلری کملیگیگه روپهره بولیب تورگنلر.
.PNG)
خانم پاتیلنینگ کوپهیتیریشیچه، ایچکی بدرغهلرنینگ قیینچیلیکلریگه ییتیشیش اوچون، میلادی 2014- ییلده افغانستان دولتی تامانیدن بیر ریجه تیارلنگن، بیراق فساد موجودلیگی و دولتی ادارهلر ظرفیتسیزلیگی باعث، اوشبو لایحه حاضرگهقدر حکومت تامانیدن عملگه آشیریلمهگن. اونینگ ایتیشیچه، حاضر اوشبو لایحه عملگه آشیریلیشی اوچون افغانستان دولتینینگ بودجهسی یوق دیر.
خلق ارا کیچیریم تشکیلاتی آسیا بولیمی باشلیغینینگ ایشانچیگه کوره، افغانستان حکومتی تامانیدن بدرغهلرنینگ قیینچیلیکلریگه دقت قیلینمهگن تقدیرده، بو قیینچیلیک چیگللیککه اوزگریشی ممکن.
بدرغهلر بیلن یقیندن اوچرهشیب صحبت اوتکزگن تشکیلات تیکشیرووچیلریدن بیری اولف بولم ویسنینگ ایتیشیچه، باش پناه و ییگولیک آذیق- آوقت یوقلیگی بدرغهلرنینگ اساسی قیینچیلیکلریدن سنلهدی و اوشبو بدرغهلردن بیرقطاری، ییگولیک آذیق- آوقت اوچون، حاضرگی وضعیتدن کوره، قماق خانهنی اوستون کورهدی.
اوشبو ییغینده بدرغهلر نمایندهلیگیدن اشتراک ایتگن بدخشانلیک بدرغه محمدحسیننینگ ایتیشیچه، کون اوتیشی بیلن قیینچیلیکلرینینگ میزانی آشهدی. اونگه کوره، باش پناه، ییگولیک آذیق- آوقت و بالهلر اوچون تعلیمات فرصتلری یوقلیگی اولرنینگ اساسی قیینچیلیکلریدن بولگن.
