اوتگن کون «دوشنبه» کیچ قورون ساعت 3:30 ده فواید عامه وزیرلیگی و شهیدلرنینگ ورثه‌لری و ناگرانلردن حمایت قیلیش ملی اداره‌سیده امنیتی کوچلر و هجومچی‌لرنینگ آره‌سیده اوروش باشلنگن ایدی و بو اوروش دوشنبه‌دن سه‌شنبه گه اوتر کیچه‌نی یریمی ساعت 1 ده یکونلندی و سلام‌وطندارنینگ خبرچیسی بوگون ایرته‌لب او ییرگه قدم قوییش گه قادر بولدی.
واقعه یوز بیرگن محل‌ده حاضر هم پولیس موترلری و آمبولانس‌لرنی سیسی ایشیتیله‌دی و شونینگدیک، محل یشاوچی‌لر ایشانچ‌سیزلیک و قورقینچ ده تورگن‌لر.
واقعه گواهلری‌نینگ ایتیشیچه، بیرینچی‌دن آق رنک‌لی کرولا تیپلی موتر شهیدلرنینگ ورثه‌لری و ناگرانلردن حمایت قیلیش ملی اداره‌سیگه باره‌دیگن فواید عامه وزیرلیگی‌نینگ آرقه کوچه‌سیگه یقین یولده 4 هجومچی‌نی توشیره‌دی و موتر قیتیش چاغیده، فواید عامه وزیرلیگی‌نینگ نیچه قدم‌لیگی‌ده پارتله‌یدی و عین حالده، هجومچی‌لر هم هجوملریگه باشله‌یدی.
واقعه گواهلریگه کوره، هجومچی‌لرنینگ حربی کییم‌لری بار ایکن و هر بیری‌نینگ قولیده بیر چانته کورینگن.
اوشبو قانلی واقعه‌نی دقیق شکلده تیکشیریش اوچون فواید عامه وزیرلیگی گه باردیم. ساعت‌لرچه کوتیش‌دن سونگ، خبرچی‌لرگه فواید عامه وزیرلیگی و شهیدلرنینگ ورثه‌لری و ناگرانلردن حمایت قیلیش ملی اداره بِنالریگه کیریش رخصتی بیریلدی.
فواید عامه وزیرلیگی گه کیرگن چاغیمیزده بیرینچی‌دن کوزیمیز توشگن نرسه اچینرلی و قیغولی ایدی.
بِنالرگه یقین بولگنیمیزده 10 ساعت‌لیک آتیشمه‌دن قالگن جنایت آچیقراق کورینردی. فواید عامه وزیرلیگی‌نینگ بِناسینی بیرینچی قبتی‌دن سونگی قبتی گچه بوزیلگن و بو وزیرلیک‌نینگ هر بیر ییریده یانغین و قان اثرلری کوزگه کورینه‌دی.
شهیدلرنینگ ورثه‌لری و ناگرانلردن حمایت قیلیش ملی اداره‌نینگ حکایه‌سی شونده‌ی بولگن. بو ییرده هم هجومچی‌لر ایشلاوچی‌لرنی اولدیرگندن سونگ، بِنانی اوتگه یاندیرگن. ایتیلیشیچه، اوشبو بِناده 11 عیال و بیر باله قتل ایتیلگن.
ساغلیق‌نی سقلش وزیرلیگی‌نی سوزلاوچیسی وحید مجروح نینگ ایتیشیچه، بو واقعه‌ده آزمه کوپ 40 کیشی هلاک و باشقه 27 کیشی یره‌لنگن.
ایچکی ایشلر وزیرلیگی‌نی سوزلاوچیسی نجیب دانش نینگ بو هجوم چوزیلگنی توغریسیده ایتیشیچه، کیچه قارانغولیگی و اطراف یشش محیط بولگنی باعث، عملیات چیگل بولیب و چوزیلگن.
اونگه کوره، مذکور ایکی اداره‌نینگ 350 ایشلاوچیسی قوتقریلگن.
اوشبو هجوم مسؤولیتی‌نی حاضرگچه هیچ بیر گروه بوینیگه آلمه‌گن؛ بیراق مملکت اجراییه باشلیغی عبدالله عبدالله، بو واقعه‌نی طالب‌لرگه نسبت بیره‌دی.
