امیریکه جمهور رییسی باراک اوباما، ناتو کوچلری تامانیدن افغانستان قندوز ولایتی چیگره‌سیز داکترلر کسلخانه‌سی اوستیگه اویوشتیریلگن هجوم‌نی تراژدی بیلیب ایتیشیچه، امیریکه مدافعه وزیرلیگی اوشبو واقعه‌نی کینگ شکلده تیرگاوگه آله‌دی.
شونینگ‌دیک بیرلشگن ملت‌لر تشکیلاتی باش کاتبی بانکی مون، اوشبو هجوم‌نی قاره‌لب، واقعه‌نی جمعی و طرف‌سیزلیک بیلن تیکشیریلیشینی سوره‌گن.
(جمعه کیچه 10- میزان) ناتو هوایی کوچلری تامانیدن، اوشبو کسلخانه اوستیگه اویوشتیریلگن هجوم نتیجه‌سیده، 7 کسل و چیگره‌سیز داکترلر تشکیلاتی ایشچیلریدن 12 ته‌سی شامل کمیده 19 کیشی هلاک بولیب و باشقه 37 کیشی یره‌لنگن.
جناب اوبامانینگ بیر اعلامیه‌ده ایتیشیچه، مذکور واقعه توغری‌سیده قرار قیلینگنی‌دن کیین، تیرگاو نتیجه‌سینی کوتیش لازم.
چیگره‌سیز داکترلر تشکیلاتی، اوشبو هجوم نی دهشت‌لی بیلیب ایتیشیچه، مذکور کسلخانه بناسی هجوم نتیجه‌سیده کوپلب زیان کورگن. اوشبو تشکیلات واقعه جدی صورتده و طرف‌سیزلیک بیلن تیکشیریلیشینی سوره‌گن.
چیگره‌سیز داکترلر تشکیلاتی رسمی‌لریگه کوره، بو هجوم اولر مذکور کسلخانه موقعیتی‌نی (جی پی اس) آرقه‌لی ناتو و افغانستان کوچلری‌گه بیللی قیلگن بیر چاغده یوزبیرگن.
اوشبو هجوم کسلخانه کسل‌لر و داکترلردن توله بولگن چاغده یوزبیرگن. تشکیلات رسمی‌لری‌نینگ کوپه‌یتیریشیچه، کسلخانه اصلی بناسی، جدی دارولش بولیمی، شاشیلینچ اتاقی و فزیوتراپی بولیمی دقیق و تکرار شکلده هدف آستیگه آلینگن؛ بیراق اطرافیده‌گی بنالر زیان کورمه‌گن.
باشقه تاماندن، بیرلشگن ملت‌لر تشکیلاتی انسان حقوقی کینگشی‌نینگ ایتیشیچه، قندوز شهری کسلخانه‌سی اوستیگه اویوشتیریلگن هوایی هجوم قصدی بولگن صورتده، اوروش جنایتی سنله‌دی.
قورال‌لی طالب‌لر ایلگری هفته کینگ شکلده قندوز شهری اوستیگه هجوم اویوشتیریب، مذکور شهرنی قولگه آلگن ایدی، بیراق اوچ کوندن کیین، افغانستان امنیتی کوچلری، ناتو کوچلری هوایی حمایتی‌ده، مذکور شهر ایریم قسمت‌لرینی قیته‌دن قولگه آلدی.
ایتیلیشیچه، آلمان حربی کوچلری‌دن بیرقطاری افغانستان امنیتی کوچلری‌گه یاردم بیریش و قندوز ولایتی‌نی طالب‌لردن قیته آلیش اوچون، مذکور ولایت‌گه یوباریلگن.
