فراه ولایتی کینگش اعضاسی گلاحمد فقیرینینگ سلاموطندارگه ایتیشیچه، قورالی طالبلر اوتکن کیچه مذکور ولایتنینگ پشترود تومنیده ملی اوردو قرارگاهسی اوستیگه هجوم قیلگنلر.
جناب فقیریگه گوره، آتیشمه نیتجهسیده ملی اوردو کوچ‌لریدن 18 ته‌سی هلاک، 4 ته‌سی یره‌لنیب و باشقه 11 ته‌سی طالبلر قولیگه توشگن.
فراه ولایتی کینگش اعضاسینینگ ایتیشیچه، قورالی طالبلر مذکور قرارگاهنینگ بوتون حربی تجهیزاتلرینی اوز لری بیلن آلیب کیتگن.
بیراق فراه پولیس قومندانلیگینینگ سوزلاوچیسی محبالله محبنینگ ایتیشیچه، اوشبو واقعهگه ملی اوردو کوچ‌لریدن 10 ته‌سی هلاک و باشقه 5 ته‌سی یرهلنگن دیر. اونینگ ایتیشیچه، آتیشمه جریانیده طالبلرنینگ تانیقلی قومندانی حافظ سیداحمد شامل 5 طالب هلاک ایتیلیب و باشقه 2 طالب یرهلنگن.
فراه پولیس قومندانلیگینینگ سوزلاوچیسی گه کوره، کماندو، ملی اوردو و ملی پولیس کوچلری محلگه باریب اویمهاوی تکشیریشنی باشلهگن.
طالبان گروهی هم اوشبو واقعهنی تصدیقلهگن.
ملی اوردو کوچلرینینگ قرارگاهسی پشترود تومنینینگ دوکین قیشلاغیده قرار تاپگن و مذکور تومن فراه ولایتینینگ ناتینچ تومنلریدن بیری دیر.
